Umuyobozi w’ishyaka ritavuga rumwe n’ubutegetsi muri Tunisia, Lotfi Mraihi, watangaje ko yifuza kuzitabira amatora ya perezida ateganijwe mu Kwakira, yatawe muri yombi na polisi akekwaho kunyereza amafaranga.
Mraihi, umuyobozi w’ishyaka ry’ubumwe bwa repubulika, akaba n’umwe mu banenga cyane Perezida Kais Saied, yatawe muri yombi kuri uyu wa Gatatu ushize, nk’uko abanyapolitiki n’ibitangazamakuru byaho babitangaje.
Umuvugizi w’urukiko muri Tunisia mu ntangiriro z’iki cyumweru yavuze ko Mraihi akurikiranweho icyaha cyo kunyereza amafaranga no gufungura amakonti muri banki zo mu mahanga nta ruhushya rutangwa na banki nkuru afite.
Ifatwa rya Mraihi rije mu gihe amashyaka atavuga rumwe n’ubutegetsi, benshi mu bayobozi bayo bari muri gereza, bashinja guverinoma ya Saied ko yashyize igitutu ku bucamanza kugira ngo bukurikirane abahanganye na Saied mu matora yo mu 2024 no kumuharurira inzira yo gutsinda manda ya kabiri.
