Mu gihe nk’iki cy’impeshyi tariki 22 Nyakanga 2017,umukandida Paul Kagame ,yari mu bikorwa byo kwiyamamaza mu turere twa Rwamagana na Kayonza ,aho yabwiye abatuye utwo turere ko kumutora mu itora ryabaye ku Tariki ya 4 Kanama 2017 ari ikimenyetso cyo gushimangira ko bafite inyota y’ iterambere rirambye ndetse no kwifuza umutekano urambye. Icyo gihe Umukuru w’Igihugu akaba n’umukandida wa FPR -Inkotanyi uyu mwaka , urimo kwiyamamaza manda y’imyaka 5 iri imbere yaganiriye n’abaturage abizeza guteza imbere imibereho myiza yabo no kubagezaho ibikorwa remezo bitandukanye.
Ku mugoroba wo ku itariki ya 22 Nyakanga 2017 , umukandida Paul Kagame yari mu karere ka Kayonza mu Murenge wa Mukarange yakirwa n’umubare munini w’abaturage bari baturutse mu mirenge yose ndetse ababwira ko impamvu yahisemo guhura nabo ku mugoroba ari umuturanyi wabo, dore ko icyo gihe yari atuye mu Kagari ka Ntebe mu Murenge wa Muhazi mu karere ka Rwamagana.
Icyo gihe umukandida Paul Kagame watsinze amatora ya Tariki ya 4 Kanama 2017 yijeje Abanya Kayonza ko umujyi wabo ugiye kwaguka ndetse ugahura n’uwa Rwamagana bikaba umujyi munini .
Yagize ati” Kayonza turifuza ko mukomeza mugatera imbere.Njye by’umwihariko turi abaturanyi niyo mpamvu nje kubasuhuza ku mugoroba.”
Icyo gihe umukandida wa RPF- Inkotanyi, Paul Kagame yakomeje ati”Banya- Kayonza , ibyo mumaze kugeraho ni byinshi . Kayonza iyi yahoraga ari agasantire gato ,ari Ihuriro ry’imihanda ihuriramo imodoka zigenda zitera abantu ivumbi ,ariko ubu Kayonza iragenda iba umujyi ,iragenda igira ibikorwa by’amajyambere . Mu minsi itari kera ari Kayonza ari na Rwamagana,biragenda bisatirana ,biri hafi kuba umujyi umwe munini cyane ushobora kuruta n’umurwa mukuru .”
Umukandida Paul Kagame,umaze gutsinda amatora ataziguye yo kuyobora u Rwanda inshuro eshatu , yakomeje yizeza Abanya -Kayonza ,iterambere no kububakira ibikorwa remezo.
Ati” Ubu rero uyu muhanda uri hano, wari umaze kwangirika urimo urakorwa ,guhera Kagitumba ugakomeza hano , ugakomeza ku mupaka wacu werekeza ku mupaka wacu na Tanzania,ibikorwa byo kuwusana byaratangiye,ibikorwa biri hafi kugera hano Kayonza.”
Paul Kagame wari umukandida wa RPF- Inkotanyi mu matora ya perezida muri 2017 yunzemo ati “Banya -Kayonza muhaguruke dukore twivane mu bukene,dukore u Rwanda rutere imbere .Dukorere mu bumwe tugere ku majyambere ,Ku bumwe no ku mutekano.Turashaka gukomeza ibikorwa byiza ,biduteza imbere ,tukubaka umusingi ukomeye , Igihugu cyacu kigakomera mu bihe biri imbere.”
Umukandida wari watanzwe na RPF -Inkotanyi muri 2017 yabwiye abatuye Kayonza ko gutora umukandida wa FPR- Inkotanyi kumutora mu matora, ari ukwimakaza Demukarasi, Ubumwe ndetse n’amajyambere .
Nyuma yo kwiyamamaza mu karere ka Kayonza, umukandida Paul Kagame yakomereje ibikorwa byo kwiyamamaza mu karere ka Kirehe na Ngoma akomereza no mu Murenge wa Kigabiro mu karere ka Rwamagana ku gicamunsi cyo ku itariki ya 23 Nyakanga 2017, habura ibyumweru bibiri ngo habe amatora y’umukuru w’Igihugu yabaye tariki ya 4 Kanama 2017.
Umukandida Paul Kagame yabwiye Abanya -Rwamagana ko abashimira intambwe bateye mu kurwanya igwingira mu bana ndetse abizeza guteza imbere imibereho myiza y’abaturage no kubagezaho amashuri n’ibindi bikorwa remezo.
Umukandida Paul Kagame yatangiye agira ati”Ntabwo nibuka neza uwabimbwiye, yabwiye ko bavuga Rwamaagana ,ahari agomba kuba ari amagaana y’amatungo ,amagaagana yavuyemo Rwamaagana ”
Yakomeje agira ati ” mukore neza, ibikorwa byubaka Igihugu cyacu bizaba bifite ubudasa ,nta handi wabisanga .Ubudasa bumwe bushingira ku bufatanye ,bushingira ku bumwe n’ubushake Abanya -Rwanda bafite .Ibyo ni ukugira ngo twubake Igihugu giteye imbere ndetse n’abatuziho amateka mabi ,bajye baza bayoberwe ibyabaye .Aho turi niho habereye Abanya -Rwanda . ”
Yakomeje ati” Banya – Rwamagana,mufite uruhare runini rwo kuzana impinduka ibyo birasaba imbaraga za buri wese , imbaraga y’urubyiruko,abahungu n’abakobwa .Banya – Rwamagana ibikorwa bimaze kigerwaho bishimishije ni ukubirinda ni ukubifata neza ,buri Munyarwanda akavanamo ikimwubaka akabivanamo inyungu tugatera imbere .,”
Paul Kagame yagarutse ku burere n’uburezi ati” Urubyiruko rwacu nirugire umuco ,rugire agaciro, nituruha amashuri rukiga ruzagira ubumenyi.kwibuka guhitamo neza mu rugendo rwo ku itariki ya 4 Kanama turufata nk’uru rugana majyambere,ni uburyo bwo gukomeza urugendo rwa Demukarasi, ni ugakomeza gushimangira ubumwe .”
Nyuma yo gutsinda amatora Bwiza.com yagerageje kureba bimwe mubyo umukandida Paul Kagame yari yemereye n’ibindi bikorwa uturere twa Rwamagana na Kayonza twagezeho , bigamije guteza imbere imibereho myiza y’abaturage .
Uyu munsi umukandida wa RPF- Inkotanyi aragera i Kayonza abatuye Rwamagana na Kayonza bafite inyota yo kumva ubutumwa burimo no kubibutsa igihango afitanye nabo dore ko yakunze kubita abaturanyi be mu bihe bitandukanye.
Ibikorwa byo kwamamaza umukandida Paul Kagame i Kayonza biteganyijwe kuri cyumweru ariko mu ijoro ryo kuwa Gatandatu abaturage benshi ntibaryamye ndetse bamwe muribo baraye ahabera ibikorwa byo kwamamaza umukandida wa RPF- Inkotanyi .
Mu masaha ya Saa mbiri z’ijoro hari hamaze kugera abaturage barenga 600 bigera mu masaha ya Saa yine hamaze kugera abarenga 2500 .
Abaturutse mu turere twa Rwamagana na Kayonza abenshi batangiye gufata imodoka ziberekeza i Mukarange hagati ya Saa Saa sita na saa cyenda z’ijoro nkuko tubikesha abaturage batuye muri utwo turere ariko hari umubare munini w’abaturage bakoze urugendo n’amaguru baturutse muri utwo turere .
Duhereye i Rwamagana, abaturage batuye mu midugudu 474 ijoro ryacyeye abenshi mu bahatuye ntibaraye basinziriye kuko bamwe muribo ntibaryamye abandi babyutse hagati ya Saa sita na saa cyenda,berekeje i Kayonza ,kwamamaza umukandida wa RPF- Inkotanyi kuri cyumweru dore ko hari hateguwe imodoka nyinshi zajyanye Abanya Rwamagana mu Murenge wa Mukarange, abaturage benshi baganiriye na Bwiza.com mu rukerera rwo Kuri iki cyumweru mbere yo kujya i Kayonza,bamwe muribo bavuga ko bishimira ibikorwa remezo bubakiwe mu myaka irindwi ishize ndetse bakaba banafite amatsiko yo kumva bindi umukandida bashyigikiye ashobora kubazeranya igihe agerera aho biteganyijwe ko yiyamariza .
Mu karere ka Rwamagana mu myaka irindwi ishize mu mujyi wa Rwamagana ugaragiye Kigali,hubatswe imihanda ya Kaburimbo ireshya n’ibirometero 28.Iyo mihanda yubatsemo mu mirenge ya Muhazi, Kigabiro na Gishari .
Hubatswe icyanya cy’inganda gifite ubushobozi bwo gukoreramo izigera kuri 53 ariko izikoreramo zuzuye zirenga 13 , mu gihe icyo cyanya gikomeje kubakwaho izindi nyinshi zubakwa n’abashoramari barimo n’abanyamahanga .
Abatuye Rwamagana bagejejweho umushinga wo kuhira imyaka watumye ubuso buhingwaho umuceri bwiyongera . Uwo mushinga watwaye hafi miriyoni 20.
Mu karere ka Rwamagana harimo Kubakwa isoko rya Kijyambere ndetse imirimo yatangiye hanugurwa agakiriro ndetse inyubako ‘isoko nizuzura abacuruzi bakorera ahagenewe imirimo y’ubukorikori umubare w’abakorera mu gakiriro ka Rwamagana uziyongera .
Mu karere ka Rwamagana Kandi umuriro w’amashanyarazi wavuye kuri 26% ugera kuri 81% mu gihe harimo Kubakwa uruganda rw’amazi rwa Karenge .
Hubatswe. Kandi ibyumba by’amashuri birenga 1000.
Nubwo Abanya Rwamagana bafite byinshi byo gushima ariko banyurwa no Kumva ,umukandida Paul Kagame avuga ku bikorwa remezo banyotewe birimo imihanda nk’uwa Rwamagana – Zaza bifuza ko uzashyirwamo Kaburimbo.Umuhanda Rugende – Karenge – Nzige ugakomeza mu Kabuga ka Musha nawo bifuza ko ikorwa ndetse hakajyamo Kaburimbo. Undi muhanda ugarukwaho ni uwerekeza ahitwa i gati ku kiyaga cya Muhazi hubatse amahoteli meza .
Bamwe mu baturage batuye umujyi wa Rwamagana bifuza ko hakongerwa imbaraga mu kuvugurura umujyi wa Rwamagana hakubakwa imihanda myinshi ndetse hakubakwa Sitade y’imikino .Abiganjemo urubyiruko bavuga ko kutagira Sitade bidindiza umupira w’amaguru dore ko n’ikipe ya Muhazi United ikinira mu karere ka Ngoma kandi ivuka i Rwamagana.
Kuba nta Sitade bitera ibihombo abatuye Rwamagana kuko abafana bajyana amafaranga i Ngoma mu ma resitora n’utubari aho kuyasiga mu mujyi wa Rwamagana.
Tugarutse ku karere ka Kayonza,aho Paul Kagame agomba kwiyamamariza naho abatuye mu mirenge itandukanye ntibaryamye nkuko tubikesha abahatuye Twaganiriye mu rukerera bari bamaze kugera ahabera ibikorwa byo kwamamaza umukandida Paul Kagame. Abaturage benshi batangiye kuva mu mirenge igicuku kinishye .
Muri aka karere bazinduwe no gushimira umuryango wa FPR -Inkotanyi n’umukandida wawo kubera ibyakozwe byahinduye imibereho y’abaturage muri aka karere mu myaka irindwi ishize.
Muri aka karere ,hashyizwe imbaraga mu mu guteza imbere w’Ubuhinzi n’ubworozi ndetse hibanzwe ku mushinga yo guhangana n’ amapfa yakunze kwibasira imirenge yegereye pariki y’Akagera, Hubatswe ibikorwa remezo birimo ibyo kukwirakwiza amashanyarazi n’amazi meza mu mirenge itandukanye.Hubatswe imihanda ya Kaburimbo ireshya n’ibirometero 76. Iyi mihanda iherereye mu mirenge ya Rwinkwavu, Kabarondo, Mukarange ndetse havugururwa n’umuhanda Kagitumba Kayonza ndetse na Kayonza -Rusumo .Hubatswe imihanda yoroshya ubuhahirane ( feeder roads) ireshya n’ibirometero 78 .
Mu Burezi mu karere ka Kayonza,hubatswe ibikorwa remezo birimo ibyumba by’amashuri bishya 1028,ibyumba byigishirizwamo ikorabuhanga byavuye kuri 15 bigera kuri 24 .Mudasobwa bikoreshwa mu mashuri zabaye 11,768 zivuye ku 6,782 . Abarimu bigisha mu mashuri ya Leta bavuye 2,186 bagera 3,562 .muri aka karere hari ingo mbonezamikurire .
Mu karere ka Kayonza hubatswe amavuriro y’ibanze 22 kugeza ubu akaba ari 37, bivuze ko hari basanzwe 15 .
Akarere ka Kayonza kaboneka pariki y’akagera ni ahantu habereye ishoramari mu bukerarugendo n’amahoteli abatuye bifuza ko ayo mahirwe yabyazwa umusaruro umujyi wa Kayonza ukaba ugatera imbere .
Muri aka karere ka Kayonza, bagaragaza ko nko Murenge wa Ndego na Kabare bafite ikibazo cy’amazi meza ndetse n’amashanyarazi ataragera hose.Abatuye Kayonza banakeneye ibibuga by’imyidagaduro ndetse n’umuferege ukumira imvubu zibonera imyaka.
Kagame azahurira n’abatuye Rwamagana na Kayonza mu Murenge wa Mukarange mu gihe yaherukaga kwiyamamariza muri utwo turere Akarere ka Rwamagana kataregukana igikombe mu mihigo ,aho mu mwaka w’imihigo 2016/2017 aho Rwamagana yagize amanota 82,2 % mu gihe 2017/2018 aka karere kaje ku isonga n’amanota 84,5% ndetse nyuma y’imyaka 2 hadatangazwa amanota y’imihigo 2021/2022 Akarere ka Rwamagana kabaye akaga Gatatu .
Umukandida Paul Kagame, kuri iki Cyumweru aragera mu karere ka Nyagatare aho ahurira n’abaturage b’ako karere barikumwe n’abanya Gatsibo benshi . Muri Nyagatare ubwo yahiyamarizaga tariki 22 Nyakanga 2017 yababwiye abaturage ko hazubakwa ibikorwa remezo bizahindura isura ya Nyagatare Kandi byarakozwe nkuko yari yabibasezeranyije ndetse ubu ibitaro yari yemereye abatuye Gatunda byaruzuye banabyivurizaho .
I Kayonza biteguye kwamamaza umukandida wa RPF- Inkotanyi kuri Iki cyumweru.
