Abantu batatu, harimo n’umunyamakuru ukorera radiyo na televiziyo ya Kameme barasiwe mu myigaragambyo yo kwamagana Perezida Ruto mu gace ka Nakuru.
Ibitangazamakuru bitandukanye byo muri Kenya byanditse ko umunyamakuru witwa Wanjeri wa Kariuki yarashwe inshuro eshatu mu kibero agwa hasi ariko ahita ajyanwa mu bitaro byigenga kugira ngo avurwe.
Ababibonye bavuga ko abapolisi barashe uyu munyamakuru nyamara yari yabanje kubereka ikarita y’akazi n’umwambaro wabigenewe.Ni mu gihe umuntu wa kabiri yarashwe ukuguru naho uwa gatatu araswa mu mugongo.
Kugeza ubu kuri uyu wa Kabiri abigaragambya bakomeje gukwirakwira mu bice bitandukanye biri hafi ya Kenyatta basaba Perezida Ruto ko yakwegura. Muri uku kwigaragambya harimo ababyitwaza bagasahura amaduka y’abacuruzi bakomeye.
Ruto mu minsi ishize yirukanye abamininisitri bari bagize guverinoma, akurikizaho n’umukuru wa Polisi Japhet Koome nyuma yo gushinjwa kugira intege nke mu guhosha imyigaragambyo ariko ntacyo byatanze kuri uru rubyiruko koko bakomeje ibikorwa byo kwigaragambya.
