Amakuru aturuka mu Burundi aravuga ko abarwanashyaka bagera ku icumi bafunzwe bacyekwaho kwica uwahoze ari umurwanashyaka wa CNL ariko nyuma akaza kwitandukanya nabo akajya muri CNDD-FDD.
Uyu mugabo wabarizwaga mu gace ka Mayuki, muri komini ya Mabayi, intara ya Cibitoke mu Majyaruguru y’Uburengerazuba bw’Igihugu, yishwe mu ijoro ryo ku wa gatandatu rishyira iryo ku Cyumweru taliki 21 Nyakanga 2024 .
Uyu wishwe wari uzwi ku izina rya Ndito ,akaba yarahoze ari umuyoboke w’ishyaka rya CNL ryahoze ari irya Agathon Rwasa nyuma akaza kwimukira mu ishyaka riri ku butegetsi rya CNDD-FDD. Yishwe akaswe umuhogo n’abantu batamenyekanye ariko mu gukora iperereza ry’ibanze hakaba harafashwe abagera ku icumi.
Nk’uko amakuru yakusanyirijwe ku mbuga zitandukanye, zitangaza ko ngo yakuwe mu rugo rwe mu ijoro ryo ku ya 20 rishyira ku ya 21 Nyakanga.
Abantu bavuga ko ngo yajyanywe bamubwira ko bagiye gukurikirana ikibazo cy’ubujura bwakorewe ku ishuri ryisumbuye rya komine Ruseeka aho yakoraga. Kuri uwo mugoroba ngo yavugaga ko agiye kureba ibyabereye kuri iri shuri ariko ngo agahita agaruka ariko siko byagenze kuko yahise ashimutwa bucyeye basanga yishwe.
Amakuru avuga ko yabonetse umuhogo wakaswe maze ujugunywa mu gace kitwa Kumanyama, ku musozi wa Nyarure, muri zone ya Buhoro, muri komini imwe ya Mabayi.
