Indege z’intambara z’u Burusiya nka Tu-160 long-range bombers ziri mu zishobora kumurikwa muri Africa Aerospace and Defense 2024 nk’uko tubikesha urubuga military.africa.
Mbere y’iki gikorwa, intumwa z’Igisirikare cy’u Burusiya zasuye ikibuga cy’indege hanze ya Pretoria ngo harebwe ko hakoherezwa izi ndege za Tu-160 ahazabera imurikagurisha. Aba basirikare bakiriwe ku kibuga cy’indege n’Umuyobozi w’Ingabo zirwanira mu Kirere muri Afurika y’Epfo.
Capt. Tebogo Kanama, Umuvugizi w’Ingabo zirwanira mu Kirere muri Afurika y’Epfo, yavuze ko Pretoria na Moscou bafitanye umubano ukomeye w’ububanyi n’amahanga nk’abanyamuryango ba BRICS.
Ati: “U Burusiya na Afurika y’Epfo byagiranye umubano w’ububanyi n’amahanga kuva kera. Nk’abanyamuryango ba BRICS, hamwe n’u Bushinwa, u Buhinde, na Brazil, bose bafite umubano w’ubukungu, umubano wa politiki, n’amasezerano y’ubufatanye mu bya gisirikare ”.
Amasosiyete menshi akora intwaro y’u Burusiya azitabira imurikagurisha, harimo Aeroscan, Katod, Roscosmos Corporation, Rosoboronexport, Technodinamika, hamwe na United Aircraft Corporation.
Mu Kwakira 2019, indege ebyiri z’Abarusiya za Tu-160 zasuye Afurika y’Epfo bwa mbere. Kugera ku birindiro by’igisirikare cyo mu kirere bya Waterkloof byahuriranye no gufungura inama ya mbere y’u Burusiya na Afurika i Sochi.
Biteganyijwe ko imurikagurisha rya Afurika Aerospace and Defence 2024 rizaba kuva ku itariki ya 18 Nzeri kugeza ku ya 22 Nzeri. Iminsi ibiri ya nyuma y’ibi birori izegurirwa imyiyereko yo mu kirere.
