Guverinoma ya Venezuela yavuze ko umukandida w’abatavuga rumwe n’ubutegetsi ku mwanya wa perezida mu matora aheruka, Edmundo González, yavuye mu gihugu, asaba ubuhungiro muri Espagne.
González yari yihishe, kandi harasohowe icyemezo cyo kumuta muri yombi nyuma y’uko abatavuga rumwe n’ubutegetsi bavuguruje ibyavuye mu matora y’umukuru w’igihugu yo muri Nyakanga, aho Inama y’igihugu ishinzwe amatora iyobowe na guverinoma (CNE) yatangaje ko Nicolás Maduro yatsinze.
Visi-Perezida wa Venezuela, Delcy Rodríguez, mu Butumwa yashyize ku mbuga nkoranyambaga yavuze ko mu minsi ishize, nyuma yo “gusaba” ubuhungiro kuri Ambasade ya Espagne i Caracas, Gonzalez yasabye Leta ya Espagne ubuhungiro bwa politiki.
Yongeyeho ko Caracas yemeye kumutwara mu mutekano kandi ko yagiye nk’uko iyi nkuru dukesha AFP ivuga.
Minisitiri w’ububanyi n’amahanga wa Espagne, José Manuel Albares, yatangaje ko González yavuye mu gihugu abyisabiye, kandi yagiye mu ndege y’Ingabo zirwanira mu kirere za Espagne.
