Imirimo yo kugaragaza imbago z’imipaka hagati ya Repubulika ya Demokarasi ya Congo na Uganda izatangira muri Gicurasi 2025 nk’uko byemejwe nyuma y’inama y’iminsi 3 hagati y’impande zombi.
Impuguke zaturutse mu bihugu byombi zabyemeje kuri uyu wa Gatanu ushize, itariki ya 6 Nzeri i Goma muri Kivu y’Amajyaruguru, nyuma y’iminsi itatu y’inama y’iminsi itatu ya komisiyo ya tekinike ya DRC na Uganda, ishinzwe kongera kugaragaza neza imipaka ibitandukanya. Muri icyo gihe, bemeje ingengo y’imari ikurikiranye y’imirimo yavuzwe izaterwa inkunga na guverinoma z’ibihugu byombi.
Impuguke zaturutse muri Repubulika ya Demokarasi ya Congo na Uganda zemeje ko imirimo yo kongera kugaragaza imbago izatangira muri Gicurasi 2025 nk’uko iyi nkuru dukesha Actualite.cd ivuga.
Ati: “Iyi raporo izatanga ingamba cyangwa amabwiriza ndetse n’uburyo bwo gushyira mu bikorwa iki cyemezo cyo kongera kugaragaza imipaka. Uganda, twiyemeje gushyira mu bikorwa izo ngamba kandi twijeje ko tuzabikora kugeza ku musozo. Ndashaka kandi gushimira abakuru b’ibihugu ba DRC na Uganda, nyakubahwa FĂ©lix Tshisekedi na Yoweri Kaguta Museveni ku bw’ubwitange bagize mu guharanira amahoro n’umutekano mu karere. Twizeye neza ko hamwe n’ubuyobozi bwiza ku rwego rwabo, nta kibazo kidashobora gukemurwa. Uganda na DRC bifitanye umubano w’amateka kandi ibi bizahoraho. Turi abavandimwe kandi twiyemeje kubana kandi niba hari ikibazo, tuziyemeza kugikemura ”, ibi bikaba byavuzwe na Colonel Naboth Mwesigwa, ukuriye intumwa z’impuguke za Uganda.
Intumwa z’impuguke z’Abanyekongo zari ziyobowe na Vangu Mabiala Alphonse, Umuyobozi wa Tekinike muri Komisiyo Ihoraho ishinzwe Imipaka muri Minisiteri y’ubutegetsi bw’igihugu, yungirijwe na Matthieu Mulala, ushinzwe ibibazo byo ku mipaka.
Visi-Guverineri wa Kivu y’Amajyaruguru, Komiseri Jean Romuald Ekuka Lipopo, wasoje ku mugaragaro iki gikorwa, yashimye icyemezo cyafashwe na Perezida FĂ©lix Tshisekedi wa DRC na Yoweri Kaguta Museveni wa Uganda kugira ngo bakemure ibibazo bahuriyeho binyuze mu nzira ya dipolomasi.
