Repubulika Iharanira Demokarasi ya Congo biciye muri Ambasade yayo mu Misiri, yahakanye inkuru ziri gucicikana zivuga ko hari indege itwara imizigo ya RwandAir yafatiwe i Cairo itwaye amabuye y’agaciro “yibwe” mu burasirazuba bwa RDC.
Ni inkuru kuva ku wa Gatanu w’icyumweru gishize zikomeje gukwirakwizwa n’abiganjemo abanye-Congo ndetse n’abandi badacira akari urutega ubutegetsi bw’u Rwanda.
Congo Kinshasa imaze imyaka irenga ibiri irega u Rwanda kuyishozaho intambara mu rwego rwo gusahura umutungo kamere wayo wiganjemo amabuye y’agaciro.
Ni ibirego Leta y’u Rwanda yakunze gutesha agaciro ibigaragaza nk’ibidafite ishingiro.
Ambasade ya RDC i Cairo mu itangazo yasohoye kuri uyu wa Mbere tariki ya 11 Ugushyingo, yavuze ko ibikomeje kuvugwa ku ndege ya RwandAir ari “impuha”.
Yagize iti: “Ambasade ya Repubulika Iharanira Demokarasi ya Congo muri Repubulika y’Abarabu ya Misiri irashaka gukura urujijo mu bantu ku ngingo yerekeye amakuru yasakaye kuri murandasi kuva ku mugoroba wo ku wa Gatanu tariki ya 8 Ugushyingo 2024, avuga ko indege itwara imizigo ya RwandAir yuzuye amabuye y’agaciro yo muri RDC yaba yarafatiwe ku kibuga cya gisirikare cya Cairo yerekeza i Burayi”.
Yunzemo iti: “Nyuma y’ubugenzuzi, biragaragara ko ari impuha, uburozi bubishye”.
