Kayenzi: Umukozi w’Abashinwa yapfiriye mu kizenga cya metero 6

Sangiza iyi nkuru

Umusore wakoraga muri kampani “COIMIKA” y’Abashinwa, icukuru amabuye y’agaciro mu murenge wa Kayenzi , akarere ka Kamonyi, yapfiriye mu kizenga cy’amazi cya metero 6.

Ni ikizenga cy’amazi gifite metero 6, kiri mu kabande k’ahitwa muri Matengu, mu mudugudu wa Buhurura, akagari ka Bugarama, mu murenge wa Kayenzi, cyacukuwe na kampani COIMIKA y’abacukuzi b’amabuye y’agaciro ifitanye imikoranire n’Abashinwa. Ahagana saa munani zo ku wa Kabiri tariki ya 26 Nzeri 2017, nibwo umusore witwa Nsengiyumva Pierre Celestin w’imyaka 22 y’amavuko yakiguyemo, akurwamo saa moya z’ijoro (19:00) yashizemo umwuka.

Mu kiganiro Bwiza.com yagiranye n’Umunyamabanga Nshingwabikorwa w’umurenge wa Kayenzi, Mandela Innocent, avuga ko amakuru na bo bafite ari ay’uko Nsengiyumva yagiye muri ayo mazi agiye koga, yibiye hasi kugaruka hejuru biramunanira.

Agira ati “ ahagana saa munani [14:00] nibwo twamenye amakuru, yari umukozi wa bo [ COIMIKA ] yabwiye bagenzi be ko agiye koga, asiga imyenda ye hejuru agezeyo aherayo”.
[xyz-ihs snippet=”google-pub”]

Akomeza avuga ko yakuwemo bigoranye, ati “Abo Bashinwa bafite ibikoresho bihagije, amaze guheramo bazanye moteri zivoma amazi, amaze gushiramo nibwo abantu bagiyemo bamukuramo yapfuye, umurambo we bahita bawujyana ku bitari i Rukoma”.

Mu gihe Umunyamabanga Nshingwabikorwa avuga ko uyu musore yagiye muri aya mazi agiye koga, abandi bakozi bakoranaga na we bavuga ko yagiyemo agiye kuzana lineti (lunettes) z’umwe mu bashinwa babakoresha, zari ziguyemo.

Ati “yabanje kuvuga ati, ‘njyewe nzi koga reka njye kuzizana’ (lineti), yakuyemo imyenda ajyamo, agezemo hasi ahari ni isayo yamufashe aheramo atyo”.

Kampani nta bwishingizi iha umukozi ku giti cye

Ubwo umunyamakuru yabazaga umunyamabanga nshingwabikorwa w’uyu murenge wa Kayenzi, niba uyu musore hari ubwishingizi yagiraga yahawe na kampani yakoreraga umunsi ku wundi, yasubije avuga ko yagiraga mituweli ( Mutuelle de Sante ) yiguriye.

Agira ati “Oya, iyi kampani nta bwishingizi iha buri mukozi, ahubwo yo iba ibufite ku buryo iyo umukozi agize ikibazo hari uko babigenza, ku bwe [Nsengiyumva] yari afite mituweli gusa”.

Akomeza avuga ko yari umukozi w’iyi kampani, ari umutekinisiye, by’umwihariko ko yanabyigiye [yize ubwubatsi]. Mu gihe hataramenyekana ibisubizo by’ibizamini umurambo we wakorewe, biteganyijwe ko ashyingurwa kuri uyu wa 27 Nzeri 2017.

Nsengiyumva Pierre Celestin yavutse ari umwana wa kabiri mu muryango w’iwabo, yabanaga na nyina Mukatuza Odette utuye mu kagari ka Mataba muri uyu murenge wa Kayenzi, n’abandi bavandimwe be batatu, se yitabye Imana ‘Nsengiyumva’ akiri muto.