Mu murenge wa Bugarama mu karere ka Rusizi hakomeje kugaragara abakobwa benshi batwara inda zitateganijwe, bamwe bakava mu mashuri kuyasubiramo bikagorana, abandi bakabera umutwaro ababyeyi babo kuko babasigira abo bana bakigendera.
Abakobwa babyariye iwabo bakiri abangavu, bavuga ko ikibatera gutwara izo nda ahanini ari ubukene n’imibereho mibi mu miryango yabo ituma bashukwa n’uwo ari we wese akabahohotera ndetse n’ ubumenyi buke ku bijyanye n’ubuzima bw’imyororokere.
Mu gikorwa cyiswe’’uwo ndiwe forum’’ cyateguwe na Imbuto Foundation kigashyirwa mu bikorwa na FASACO, aba bakobwa bagera ku 150 bo muri uyu murenge, bavuze ko bahura n’ibishuko byinshi birimo iby’abagabo bubatse babashukisha utuntu badafite iwabo, abasore bababwira ko bazabajyana bakazibatera barangiza bakabigurutsa, n’ibindi.
Umwe muri aba bakobwa yabwiye Bwiza.com, ko yatwaye inda atararangiza icyiciro cya mbere cy’amashuri yisumbuye, ayitewe n’umugabo wamushutse ko azamuha telefoni igendanwa, nyamara anarangije ntiyayimuha.
Agira ati “duhura n’ibishuko byinshi kubyikuramo bikatugora, turamutse duhawe amahugurwa ahagije ku buzima bw’imyororokere nk’uko Imbuto foundation yabikoze, tugasasa inzobe ku bibazo byacu n’abandi bakabyumva, izi nda zitateganijwe zagabanuka kuko ubona hano bikabije cyane.
Akomeza agira ati “Nkatwe twiyemeje ko ntawe uzongera kudushuka ngo adufatire ku bukene n’ibindi bibazo adukoreshe imibonano mpuzabitsina idakingiye, kuko ingaruka ari twe ba mbere zigeraho”.
[xyz-ihs snippet=”google-pub”]
Uhagarariye Ihuriro ry’amashyirahamwe riharanira ko abaturage bahabwa serivisi z’ubuzima nziza kandi zinoze (FASACO) mu turere twa Rusizi na Nyamasheke, Uwizeye Emmanuel, yavuze ko bafashe ingamba zo kongera ubukangurambaga muri kiriya kibaya cya Bugarama, cyane cyane muri uyu murenge, kugira ngo izi nda zigabanuke mu rubyiruko.
Ati “tugiye gukora ibishoboka byose, dufatanije n’ubuyobozi bw’umurenge n’akarere, twigishe ruriya rubyiruko ruhindure imyumvire kuko rurakomeza kubyara abana batitabwaho uko byakagombye, tunabashishikarize kwibumbira hamwe kugira ngo hagize n’inkunga yaboneka baterwa ngo bave mu buzima bubi barimo, ibe yasanga bari hamwe hari n’intambwe bamaze gutera,… n’inyigisho ku buzima bw’imyororokere tugiye kuzihakomeza.’’
Ushinzwe irangamimirere n’ibibazo by’abaturage muri uyu murenge wa Bugarama, Habyarimana Déogratias, avuga ko n’ubwo batarashyira hamwe imibare y’abakobwa babyariye iwabo ariko ko iri hejuru cyane.
Habyarimana akomeza avuga ko ikibazo gikurura ibyo byose ari ubuharike n’ubushoreke bikomeza kuba byinshi, ngo aho usanga hari umugabo ufite abagore 4 n’abana barenga 30 adashobora guhaza, bakararikira ibibateza izo nda.
Hari n’amakimbirane yo mu ngo atuma aba bana bamera nk’abihebye bakishora muri izi ngeso, ariko ko hafashwe ingamba zikaze, cyane cyane ku bagabo bahohotera aba bana, kubiceceka na bwo bigahagarara, agasaba inzego zose bireba guhaguruka bakarengera aba bana kuko ingaruka ziba nyinshi, haba kuri bo no ku bo babyaye.
Imibare ya Minisiteri y’uburinganire n’iterambere ry’Umuryango (MIGEPROF), igaragaza ko mu 2016, abana b’abakobwa bari hagati y’imyaka 16-19 bagera ku 17500 mu gihugu hose batewe inda zitateguwe ndetse binabagiraho ingaruka zitandukanye zirimo no kuva mu ishuri,…
Kanda hano ujye ubona amakuru yihuse kandi kugihe kuri Facebook no kuri twitter
Bahuwiyongera Sylvestre/Bwiza.com
