Abayobozi mu nzego zitandukanye mu Ntara y’Iburasirazuba barasabwa gutekereza ku buryo igenamigambi ry’ibikorwa by’Uturere by’umwaka wa 2018-2019 rishingira ku mishinga minini hakitabwa ku bikorwa bizana impinduka ku buzima bw’Abaturage n’iterambere ry’Akarere n’Intara muri rusange.
Guverineri w’Intara y’Iburasirazuba Bwana Mufulukye Fred yabisabye abayobozi batandukanye bitabiriye inama nyunguranabitekerezo ku igenamigambi ry’Uturere ry’ibikorwa by’umwaka wa 2018-2019 yabaye ku wa Gatandatu tariki ya 11 Ugushyingo 2017. Guverineri yasabye abitabiriye iyi nama gutekereza ku mishinga izana ibisubizo ku bibazo byihariye bigaragara mu turere tugize iyi Ntara.
Ati: “Hari ikibazo cy’izuba ryinshi rituma havuka n’ibindi bibazo by’amapfa mu Turere tumwe na tumwe tw’iyi Ntara, hari n’ibindi bibazo usanga duhora duhanganye nabyo, iri genamigambi dukora rikwiye ridufashe gushaka ibisubizo by’ibi bibazo”.
[xyz-ihs snippet=”google-pub”]
Guverineri yabasabye ko badakwiye kugira ubwoba bwo gutegura imishinga minini bitewe n’ingengo y’imari ishobora kuba nke, abibutsa ko bene iyi mishinga minini ishobora gushyirwa mu bikorwa mu byiciro bitandukanye (Phases), ndetse ko ahobishoboka hakoreshwa n’ubundi buryo nk’imiganda n’ibindi mu kunganira ingengo y’imari.
Ibikorwa bikubiye mu igenamigambi ry’Uturere ry’umwaka wa 2018-2019, byatoranyijwe hashingiwe ku byifuzo byagaragajwe n’Abaturage hirya no hino mu midugudu. Bimwe mu byagamiriweho muri iyi nama bigaragara mu mbanzirizamushinga w’igenamigambi ry’umwaka wa 2018-2019 harimo ikibazo cy’amazi meza ku baturage no mu nzuri, Ibikorwa remezo nk’imihanda, kongera inganda zitunganya umusaruro w’ibikomoka ku buhinzi n’ubworozi, iterambere ry’imijyi n’ibindi.
Perezida w’inama Njyanama y’Akarere ka Kirehe, Bwana Rwagasana Erneste, yavuve ko ubu buryo butuma abaturage bagira uruhare mu gufatanya n’abaybozi gushyira mu bikorwa imihigo. yagize ati “Ubu buryo bwatumye kuri ubu umuturage imihigo ayigira iye kuko usanga imihigo ishingira kubyifuzo byabo bitewe n’ibyo babona bakeneye ko byakorwa aho batuye, bityo bituma no kubikora babigira ibyabo aho kumva ko ari iby’ubuyobozi gusa”
Abari muri iyi nama basabwe kandi ko muri iri genamigambi ry’Uturere ry’umwaka wa 2018-2019 ritegurwa, bazirikana gahunda ya Leta ya Vision 2020 isigaje imyaka 2 ngo irangire,Gahunda ya Guverinoma y’imyaka irindwi, Gahunda z’Iterambere z’Akarere (LED strategy) n’izindi gahunda za Leta nkoguhanga imirimo, Kunoza imiturire, kwita ku isuku no kurimbisha imijyi
Iyi nama yahuje Ubuyobozi bw’Intara y’Iburasirazuba, Abagize Komite Nyobozi z’Uturere, Inama Njyanama, Abayobozi ba PSF mu Turere, Abahagarariye ibyiciro byihariye nka NCF, NCPD, CNJ n’abahagarariye za Minisiteri n’ibindi bigo bya Leta.
Src:@RwandaEast
Kanda hano ujye ubona amakuru yihuse kandi kugihe kuri Facebook no kuri twitter
@bwiza.com
