Kuri uyu wa Gatandatu ninjoro Igipolisi cya Uganda cyaburijemo igitaramo umuhanzi akaba n’umudepite, Robert Kyagulanyi uzwi nka Bobi Wine yari agiye gukorera mu Karere ka Kigumba-Kiryandongo.
Iyi nkuru dukesha Chimpreports iravuga ko Bobi Wine yabanje kuzenguruka mu mujyi aherekejwe n’amamodoka agenda asuhuza abaturage bo muri ako karere, aho abaturage biganjemo urubyiruko bamugaragarije ko bamwishimiye.
[xyz-ihs snippet=”google-pub”]
Biravugwa ko Bobi Wine yakoresheje aka kanya yari abonye agakangurira abaturage kwitabira igitaramo cye bakabyinana indirimbo ye yise Songs of Freedom.
Amasaha makeya mber y’uko igitaramo gitangira, Bobi Wine yaje gutangaza ko yategetswe guhagarika icyo gitaramo agasubira I Kampala.
Yagize ati: “Twasohowe ku ngufu mu byumba bya hotel na polisi idutegeka gusubira inyuma I Kampala.” Yakomeje agira ati: “Bavuze ko ari itegeko rivuye hejuru. Umuntu aribaza ubwoko bwo kudahana igihugu cyecu kirimo.”
Mu mezi makeya ashize nibwo Depite Robert Kyagulanyi aka Bobi Wine yasohoye indirimbo yise “Songs of Freedom”, indirimbo ifitanye isano na politiki bivugwa ko igamije gutangira gushishikariza abaturage kuzamushyigikira muri gahunda afite yo kuziyamamariza kuyobora Uganda mu 2021.
Bamwe bavuga ko iyi ndirimbo igamije kugumura abaturage, ariko Bobi Wine ibi akabihakana.
Bobi Wine yakomeje avuga ko iki gitaramo cye cyahagaritswe n’igipolisi nyamara ari nacyo cyari cyamuhaye uburenganzira bwo kugikora.
Bikaba bivugwa ko igipolisi cyari cyoherejwe ku bwinshi kuri Max Hotel kwitambika iki gitaramo cyagombaga kuhabera.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
