Mu gihe amabanki n’ibigo by’imari usanga biharanira gufungura amashami mashya mu bice bitandukanye by’igihugu, banki nyafurika, Ecobank yo irakataje mu kuyagabanya hirya no hino mu turere tw’igihugu, abayakoragamo bakaba bagomba gushakishiriza imirimo ahandi.
Muri Mutarama 2018, Ecobank iteganya gufunga amashami agera kuri 5 yo mu turere turimo Musanze, Rubavu, Nyagatare, Muhanga ndetse na Rwamagana abakoraga muri aya mashami basaga 50 bakaba bazabura imirimo bakajya gushakishiriza ahandi.
Uyu mwanzuro ufashwe mu gihe uturere twa Musanze na Rubavu twanahanaga imbibi na Uganda na Repubulika Iharanira Demokarasi ya Congo, dukize ku bikomoka ku buhinzi, ubuhahirane n’ibyo bihugu ndetse n’ibikorerwa mu nganda, mu gihe Nyagatare yari iteye imbere ku bikomoka ku bworozi bw’inka n’ubuhinzi naho Muhanga na Rwamagana byo bikaba byari bikize cyane ku bikomoka ku buhinzi.
[xyz-ihs snippet=”google-pub”]
Nk’uko Ktpress dukesha iyi nkuru ibivuga, Ubuyobozi bw’iyi banki buvuga ko abakorera mu mujyi wa Kigali bashobora no gukora bataha mu turere bihana imbibi cyangwa bagakorera muri utwo turere ariko bagataha mu mujyi.
Umuyobozi ushinzwe amasoko muri iyi banki, Manzi Don Yusuf yemeje iby’iri fungwa ry’amashami, avuga ko ukwezi kwa mbere kuzasiga imiryango ifunze.
Yasobanuye ko impamvu yo yo gufunga aya mashami ari ukuba haraje iterambere ku buryo umuntu ashobora kubitsa amafaranga aho ari hose mu buryo bw’ikoranabuhanga atiriwe ajya ku kicaro cyangwa ku ishami bityo n’ayo mashami bikaba Atari ngombwa ko abaho.
Si aya mashami gusa afunzwe kuko no mu mwaka washize hafunzwe andi mashami mu mujyi wa Kigali arimo irya Remera, Kimironko ndetse n’irya Nyabugogo.
Aya mashami yafunzwe akurikirana n’ayo mu turere twa Ngoma, Nyanza, Ruhango, Karongi ndetse na Gicumbi.
Ecobank ni imwe mu mabanki yashinze imizi mu Rwanda guhera mu myaka itari micye ishize, ikaba inakorera mu bihugu bigera kuri 36 byo ku mugabane wa Afurika.
Kanda hano ujye ubona amakuru yihuse kandi kugihe kuri Facebook no kuri twitter
