Umukuru w’inyeshyamba z’umutwe wa Nyatura/FDDH, Kasongo Kalamo, kuri uyu wa Gatatu ushize, itariki 20 Ukuboza 2017, yiciwe mu mirwano yahuje inyeshyamba ze n’inyeshyamba z’Abanyarwanda zo mu mutwe wa FDLR/CNRD yabereye ahitwa Bukama, agace gaherereye mu birometero nka 15 uvuye mu mujyi wa Kitshanga muri Masisi, ho muri Kivu y’Amajyaruguru.
Amakuru aturuka ahabereye iyi mirwano avuga ko, Kasongo Kalamo, wari warihaye ipeti rya General, ari kumwe n’ingabo ze, baguye mu mutego bari batezwe n’inyeshyamba za FDLR/CNRD ahagana saa moya n’igice. Uyu akaba yarahitanywe n’ibikomere nyuma yo kurasirwa muri iyi mirwano.
[xyz-ihs snippet=”google-pub”]
Amakuru akaba akomeza avuga ko umurambo we wahise ujyanwa n’inyeshyamba ze ahitwa Mbuyi hari ibirindiro bikuru bya Nyatura/FDDH.
Aya makuru nk’uko Radio Okapi dukesha iyi nkuru ikomeza ivuga, ngo kuri uyu wa kane yateje icyoba muri Masisi ndetse bituma abaturage babarirwa mu bihumbi mu biturage bya Bukama, Mbuyi, Kashanjena Rugarama bata ingo zabo kimwe n’ibiturage bituriye udusozi twa Mweso ugana muri Mweso rwagati.
Aba baturage bahunze bakaba batangaza ko batinye ko Nyatura yahita igaba ibitero bigamije guhora iyicwa ry’umuyobozi wayo hakavuka imirwano ikomeye hagati y’iyi mitwe ibiri y’inyeshyamba muri iki gice.
Iyi nkuru irasoza ivuga ko inyeshyamba za FDLR n’iza Nyatura zikunze gushyamirana mu bice bitandukanye bya Masisi buri ruhande rushaka kuhigarurira.
Kanda hano ujye ubona amakuru yihuse kandi kugihe kuri Facebook no kuri twitter
Dennis Ns./Bwiza.com
