Guverineri w’Intara y’Iburengerazuba arasaba ubuyobozi bw’Uturere tugize Intara gukangurira abaturage gufasha inzego z’umutekano kurushaho kubumbatira umutekano muri ibi bihe by’impera z’umwaka wa 2017. Ibi Guverineri Munyantwali Alphonse yabibasabye mu nama y’umutekano yaguye y’Intara yabereye i Karongi ku cyicaro cy’Intara, kuwa 21 Ukuboza 2017.
Muri iyi nama yari yitabiriwe n’inzego z’umutekano ku rwego rw’Intara n’Uturere ndetse n’Abayobozi b’Uturere tugize Intara, hasuzumiwe hamwe uko umutekano wari wifashe mu mezi abiri ashize (Ukwakira- Ugushyingo 2017), n’ingamba zo kuwubumbatira muri iyi minsi mikuru ya Noheri n’ubunani.
[xyz-ihs snippet=”google-pub”]
Nk’uko byasobanuwe n’umuyobozi wa Polisi mu Ntara y’Iburengerazuba, ACP Karasi Emmanuel, muri rusange umutekano wari wifashe neza muri aya mezi abiri ashize uretse ibikorwa bimwe na bimwe byagiye bigaragara birimo ubwicanyi 08, ndetse n’abantu 11 bapfuye bahitanwe n’impanuka zo mu muhanda. Muri rusange ngo ibyaha biza ku isonga birimo, gukubita no gukomeretsa, gusambanya abana, kunywa no gucuruza ibiyobyabwenge ndetse n’ubujura buciye icyuho, ibi byonyine bikaba byihariye 66% by’ibyaha byose byakozwe.
Mu ngamba zafashwe harimo kumenya ahantu hose hateza umutekano muke hagacungirwa umutekano wihariye cyane muri ibi bihe by’iminsi mikuru ya Noheli n’Ubunani, gukaza umutekano ahahurira abantu benshi n’ubufatanye bw’inzego zitandukanye hatangirwa amakuru ku gihe.
Abari mu nama bagejejweho kandi ibijyanye n’ikibazo cy’abana b’abakobwa baterwa inda, aho umuhuzabikorwa w’Inama y’Igihugu y’Abagore mu Ntara y’Iburengerazuba, Madamu Mukandekezi Franà§oise yagaragaje ko kuva Mutarama —Ugushyingo 2017, abana bagera ku 1049 bari hagati y’imyaka 14 na 17 batewe inda nk’uko iyi nkuru y’urubuga rw’intara ikomeza ivuga.
Nk’uko byasobanuwe kandi muri iyi nama ngo ibibazo byinshi by’aba bana ntibigezwa ku buyobozi kugira ngo bikurikiranwe ndetse na bimwe byashyikirijwe inzego za polisi hakabura abatangabuhamya kugira ngo bijyanwe mu butabera kubera ko bamwe mu bana ndetse n’ababyeyi babo bahishira ababateye inda. Abayobozi mu nzego zose bakaba basabwa gukangurira abana n’ababyeyi kudahishira ibikorwa bibi nk’ibyo n’ababikoze.
Guverineri Munyantwali Alphonse yavuze ko iki kibazo gihangayikishije, asaba inzego zose mu Ntara ubufatanye mu gutangira amakuru ku gihe kuri abo bana batewe inda kugira ngo ababikoze bashyikirizwe ubutabera.
Kanda hano ujye ubona amakuru yihuse kandi kugihe kuri Facebook no kuri twitter
@bwiza.com
