Umupasiteri wa mbere ukize kurusha abandi ku isi afite akayabo ka miliyari isaga y’Amadolari nk’uko bigaragara ku rutonde rw’abapasiteri 20 bakize cyane kurusha abandi ku Isi rwa Forbes.
1.Edir Macedo: Ni umupasiteri akaba n’umuvugabutumwa wo muri Brazil ufite miliyari 1,1 z’Amadolari. Uyu washinze itorero rizwi nka Universal Church of the Kingdom of God akaba anafite studio izwi nka Grupo Record niwe mupasiteri wa mbere w’umuherwe ku isi.
2. Kenneth Copeland: Niwe washinze kandi niwe nyiri Kenneth Copeland Ministries akaba afite umutungo ubarirwa muri miliyoni 760$.
3. Pat Robertson: Afite miliyoni 500$ ni umuherwe mu bijyanye n’itangazamakuru wo mu itorero ry’Ababatista rizwi nka Southern Baptist ministries. Amafaranga menshi akaba yarayasaruye mu bigo n’miryango myinshi yashinze ndetse na kaminuza. Ibigo yashinze birimo iby’itangazamakuru nka The International Family Entertainment Inc, Christian Broadcasting Network (CBN), yanashinze ikigo cy’amategeko kitwa American Center for Law & Justice (ACLJ), Regent University, akaba afite indege ya Boeing 757 ibamo ibitaro.
4. George Foreman: Uyu yahoze ari umuteramakofe wabigize umwuga akaba ari umuvugabutumwa mu itorero ryitwa The Church of Lord Jesus Christ muri Houston (USA). Uyu mugabo wibitseho akayabo ka miliyoni 250$ aherutse gusohora igitabo cye yise “God in My Corner: A Spiritual Memoir”.
5. Bishop David Oyedepo: Ni umuvugabutumwa wo muri Nigeria washinze amatorero arimo Faith Tabernacle, Cannanland, na Living Faith Church Worldwide, akaba afite kaminuza 2; Landmark na Convenant University. Afite umutungo ubarirwa muri miliyoni 150$, akaba ari we mupasiteri wa mbere ukize muri Nigeria no muri Afurika.
6. Pastor E.A Adeboye: Uyu akuriye Redeemed Christian Church of God, akaba afite miliyoni 130$, aho ngo abayeho ubuzima nk’ubw’abandi bakire benshi b’abapasitoro muri Nigeria.
7. Bishop Ayodele Oritsejafor: Uyu nawe ni umwe mu bapasiteri b’abaherwe muri Nigeria na miliyoni ze 120$, aho bivugwa ko yashoye imari mu bijyanye n’amabanki, mu bwubatsi, ubwikorezi no mu itangazamakuru.
8. Prophet Uebert Angel: Yashinze Spirit Embassy Church. Azwiho kwifatanya n’abakene n’abapfakazi mu gihugu cye akaba avugwaho kuba atunze miliyoni 60$.
9. Chris Oyakhilome: Yashinze itorero rizwi nka Christ Embassy rifite abayoboke bagera mu 40,000 akaba abarirwa umutungo ungana na miliyoni 50$. Benshi mu bayoboke be ni abanyapolitiki na ba rwiyemezamirimo.
10. Benny Hinn: Ayobora gahunda yiswe Miracle Crusade aho usanga ibibwirizwa bibera mu masitade manini akaba abarirwa miliyoni 42$.
11. Joel Osteen: Ni pasiteri akaba n’umuvugabutumwa kuri za televiziyo wananditse ibitabo byinshi bya gikirisitu. Abarizwa mu itorero ryitwa Lakewood Church ryo muri Houston, Texas. Nawe abarirwa miliyoni 40$
12. Pastor Tshifinwa Irene: Abarizwa muri Pine Truth World Restoration Services for World peace by Jesus Christ. Uyu mugore n’itorero rye baherereye ahitwa Venda muri Afurika y’Epfo akaba abarirwa miliyoni 35$.
13. Creflo Dollar: Ni umupasiteri akaba n’umwarimu w’ijambo ry’Imana. Itorero rye ryitwa World Changers Church International. Ni umupasiteri uzwi muri Leta Zunze Ubumwe za Amerika ufite umutungo ubarirwa muri miliyoni 27$.
14. Pastor Ray Macaulay: Aba muri Afurika y’Epfo itorero rye rikaba ryitwa Rhema Bible Church. Yatangiye kwiga ibyo kubwiriza mu 1979 arangije ashinga itorero afatanyije n’umuryango we. Nawe abarirwa miliyoni 27$.
15. Billy Graham: Ni umubwirizabutumwa w’icyamamare ubwiriza kuri za televiziyo no ku maradiyo menshi ubarirwa miliyoni 25$.
16. Rick Warren: Azwi cyane no mu Rwanda akaba yarashinze Saddleback Church iherereye Lake Forest California. Nawe abarirwa miliyoni 25$.
17. Bishop T.D. Jakes: Abarirwa miliyoni 18$. Ni umubwirizabutumwa akaba n’umwanditsi ubarirwa miliyoni 18$.
18. Prophet T.B. Joshua: Uyu ni umupasiteri ukunze kutavugwaho rumwe muri Nigeria akaba anakunda gukora ibikorwa byo gufasha ufite itorero ryitwa Synagogue Church of All Nations. Abarirwa miliyoni 15$.
19. Pastor Matthew Ashimolowo: Yashinze Kingsway International Christian Center mu Bwongereza, akaba abarirwa umutungo ungana na miliyoni 10$.
20. Juanita Bynum: Ni Umunyamerikakazi ubwiriza kuri za televiziyo, akaba umwanditsi, umuririmbyi ndetse n’umukinnyi wa sinema. Abarirwa miliyoni 10$.
Kanda hano wiyandikishe ( Subscribe) ubona ibiganiro, indirimbo kandi bishya mu mashusho
Denis Nsengiyumva/bwiza.com
