Iyi ntero yashimangiwe mu ijambo, Perezida Kagame yageneye abanyarwanda kuri uyu munsi w’ intwari abasaba ko barebera ku ndangaciro zaranze intwari z’igihugu bityo ‘urugero badusigiye rukaduha imbaraga n’icyerekezo bitubereye.’
Ku nshuro ya 24 , Perezida Paul Kagame yunamiye intwari z’igihugu anashyira indabo ku gicumbi cyazo giherereye mu Mujyi wa Kigali i Remera mu gihe hibukwa ibigwi byazo.
Mu ntwari ziruhukiye muri iki gicumbi zirimo Gen. Maj Fred Gisa Rwigema n’umusirikare Utazwi bari mu cyiciro cy’Intwari z’Imanzi.
Harimo Umwami Mutara III Rudahigwa, Rwagasana Michel, Uwiringiyimana Agathe, Niyitegeka Félicité n’Abanyeshuri b’i Nyange banze kwitandukanya ubwo baterwaga n’abacengezi tariki 18 Werurwe 1997, bari mu cyiciro cy’Imena.
