Umugore wa Col.John Tshibangu wahoze mu gisirikare cya Congo (FARDC) akaza kukivamo ndetse agatangaza ko yashinze umutwe w’inyeshyamba, nyuma yaho Leta ya Tanzania imufatiye ikamuha iya Congo, umugore we avuga ko ahangayikiye ubuzima bwe.
Col.John Tshibangu yatorotse igisirikare cya Congo mu 2012, afatwa ku wa 29 Mutarama 2018 muri Tanzania yoherezwa muri Congo. Uyu musirikare yagiye atambutsa ubutumwa bwiswe ubw’iterabwoba kuri Leta ya Kabila abicishije muri video zagiye zicicikana ku mbuga nkoranyambaga, asaba Perezida Kabila kuva ku buyobozi bitarenze iminsi 45.
Mu gihe Col.John Tshibangu ari mu maboko ya Leta ya RD Congo, umuryango we uvuga ko uhangayitse cyane, ko ubuzima bwe buri mu kaga, ko azicwa na Leta wita iy’abicanyi.
Moke Mamie Tshibangu Charlène, umugore wa Col John Tshibangu, agira ati “Umugabo wanjye ni jenerali, yatangaje intambara, kuba yaroherejwe bizamuviramo urupfu, naririye amanywa n’ijoro imiryango iharanira uburengenzira bw’ikiremwamuntu nsaba ko atakoherezwa muri Congo, mu gihe bidashobotse umugabo wanjye ni umupfu, azicwa n’ubuyobozi nkoramaraso bwa Kabila”.
Minisitiri w’umutekano muri RD Congo, Crispin Atama, yatangarije BBC ko umutekano wa Col. John Tshibangu wifashe neza, ko yiteguye gushyikirizwa ubutabera, ashinjwa gushinga umutwe w’inyeshyamba. Yizeye ko urubanza rwe ruzacibwa mu mucyo n’ukuri.
Kanda Subscribe ujye ubona Video zigezweho
