Ishami ry’Umuryango w’Abibumbye ryita ku mpunzi (UNHCR), mu gihugu cya Uganda, ritangaza ko impunzi 26 z’Abanye-Congo zishwe n’impiswi aho zikambitse muri Uganda.
Mu kiganiro umuvugizi wa HCR muri Uganda, Duniya Aslam Khan, yagiranye na AFP, yatangaje ko izi mpunzi zapfuye ari zimwe mu zahunze intambara zikomeje kubera mu Burasirazuba bwa Congo.
Ati “Ntabwo twari twahabwa amakuru mpamo na Minisitiri y’Ubuzima muri Uganda, ariko abafatanyabikorwa bacu mu bijyanye n’ubuzima bari mu nkambi ya Kyangwali bagaragaza ko bakiriye abantu 424 barwaye impiswi (diarrhée).
Yakomeje agira ati “Umubare wabishwe n’impiswi ni 26 mu gihe cyo kuva ku wa 15 kugeza ku wa 18 Gashyantare 2018, abapfuye bose batanzwe muri raporo ndetse bakaba ari Abanye- Congo bahunze vuba”.
Yakomeje asaba ko hakongerwa ubufasha mu kubungabunga ubuzima bw’impunzi ziri mu nkambi ya Sebagoro na Kyangwali, ziri hafi y’ikiyaga cya Albert, mu birometero bike uvuye ku mupaka wa RDC , mu Burengerazuba bwa Uganda.
Radiyo Okapi itangaza ko kuva ku itariki ya 1 Mutarama 2018, impunzi zisaga 27.300 z’Abanye Congo zagiye zambuka ikiyaga cya Albert zihungira muri Uganda, zikaba zaragiye zihunga imirwano imaze iminsi ivugwa mu Ntara ya Ituri.
