Abahutu bo muri Congo bashinjwa gutera ingabo mu bitugu FDLR

Abantu icyenda bishwe ku wa Mbere tariki ya 26 Gashyantare 2018, mu Burasirazuba bwa Repubulika Iharanira Demokarasi ya Congo, imitwe y’inyeshyamba ikaba ariyo itungwa agatoki.
Umuyobozi mu gace ka Bwalanda, Jeannot Makasi, aganira na AFP yagize ati “ Mu bitero byagabwe na Maà¯-Ma௠Nyatura[Inyeshyamba z’Abahutu] mu gace ka Bwalanda, abasivile bane bahasize ubuzima,… n’inyeshyamba enye zicwa n’abasirikare ba Leta”.
Makasi akomeza agira ati “ ibitero by’inyeshyamba byarabaye, habaho gutwikwa kw’inzu [ibigonyi] z’abaturage mu gace ka Mutanda gatuwe n’abahutu benshi b’Abanye Congo”.
Avuga ko ibi bitero byagize ingaruka nyinshi ku baturage bahagaritse imirimo yabo ahanini y’ubuhinzi, abana bahagarika amashuli bahungana n’ababyeyi babo.
Muri aka gace ka Bwalanda gaherereye muri Teritwari ya Ritshuru muri Kivu y’Amajyaruguru, ngo kabarizwamo abaturage b’amoko atatu; Hutu, Nande na Hunde. Ubu bwoko butatu bukaba ari bwo bugenzura aka gace.
Ubwicanyi bukorerwa abaturage b’ubwoko bumwe si ubwa mbere buvuzwe muri aka gace dore ko mu mwaka wa 2017, abantu benshi bahishwe. Ikinyamakuru africatime.com dukesha iyi nkuru kikaba gitangaza ko kuva uyu mwaka watangira ari bwo busubiriye.
Gitangaza ko Abanande n’Abahunde bashinja Abahutu b’Abanye Congo, ngo bafatwa nk’abavamahanga, gutera inkunga inyeshyamba za FDLR zaturutse mu Rwanda mu mwaka wa 1994.
Umuryango w’Abibumbye hamwe na Leta zunze ubumwe za Amerika zifata umutwe wa FDLR nk’umwe mu mitwe irwanira ku butaka bwa Congo y’iterabwoba. Uyu mutwe ukaba ugizwe na bamwe bashinjwa kugira uruhare muri Jenoside yakorewe Abatutsi mu Rwanda mu 1994.