Abasirikare ba FARDC bafatanyije na Polisi ya RDC batangiye kugaba ibitero byo guhangana n’imitwe yitwara gisirikare iherutse guhambiriza ibigo bitanu bya polisi muri Masisi.
Ibi bitero bikaba byagabwe muri Masisi hagamijwe kubohoza ibigo bya polisi bitanu byigaruriwe n’umutwe wa Nyatura ufatanyije na APCLS ndetse no kubohoza aka karere muri rusange.
General Charles Bisengimana umukuru wa Polisi muri Kongo avuga ko batangiye gutanga amabwiriza y’uburyo babohoza aka gace kigaruriwe n’iyi mitwe yombi. Ngo ibi biratuma abapolisi birukanywe muri aka gace bongera kuhagaruka.
General Charles ati « Nibyo koko inshuro nyinshi imitwe ya polisi muri territoire ikunze guhura n’ikibazo cy’ibikoresho bidahagije byabafasha guhangana n’imitwe yitwara gisirikare ifite intwaro ziremereye, inshuro nyinshi dutakaza abapolisi benshi kimwe n’abaturage. Iyi niyo mpamvu imitwe itanu ya polisi yahunze ibirindiro byayo muri Localite ya Kirumba.”
Ku rundi ruhande umukuru w’ingabo za FARDC afatanyije n’umukuru wa polisi muri ako gace batangiye guhuriza hamwe imitwe ya polisi n’iya gisirikare mu kujya guhangana n’izi nyeshyamba.
Umuyobozi mukuru wa Polisi avuga ko bafashe ingamba zikarishye zo kurinda abaturage.
Ibi bije mu gihe mu byumweru bibiri bishize abapolisi bataye ibigo bitanu byabo biherereye muri gurupoma ya Bashali Mukoto muri Masisi bafite impungenge z’umutekano wabo.
Nyuma y’aho umuyobozi w’aka gace Dieudonne Tshishiku yasabye guverinoma ya RDC gukora ibishoboka byose umutekano ukagaruka muri aka gace ka Kivu ya Ruguru.
nda hano ujye ubona amakuru yihuse kandi kugihe kuri Facebook no kuri twitter
Alphonse Munyankindi / Bwiza.com
