Urukiko ku Rwego Rwisumbuye rwa Muhanga rwasomeye mu ruhame aho icyaha cyakorewe mu kagari ka Gihara urubanza Ubushinjacyaha bwari bukurikiranyemo Havugimana Vincent, icyaha cy’ubwicanyi yakoreye murumuna we. Rwamuhamije icyo cyaha , maze rumuhanisha igihano cy’igifungo cya burundu nk’uko ubushinjacyaha bwari bwacyimusabiye.
Ku wa 27 Gashyantare 2018 Ubushinjacyaha ku rwego rwisumbuye rwa Muhanga rwasabiye igahano cy’igifungo cya burundu uwitwa Havugimana Vincent ukekwaho kwica murumuna we witwa Gasimba Simoni akoresheje igice cy’icupa. Uru rubanza rwaburanishirijwe mu ruhame n’Urukiko rwisumbuye rwa Muhanga ahari abaturage benshi baje kureba imikirize yarwo.
Nk’uko bigaragara ku rubuga rw’ubushinjacyaha bukuru, Urukiko rwisumbuye rwa Muhanga ku wa kabiri tariki 27 Gashyantare 2018 rwaburanishirije mu ruhame uwitwa Havugimana Vincent ushinjwa kwica umuvandimwe we Gasimba Simoni akoresheje igice cy’icupa.
Uregwa yazanywe n’abakozi b’urwego rw’Igihugu rushinzwe imfungwa n’abagororwa aho yakoreye icyaha mu Murenge wa Runda, Akagari ka Gihara ho mu Karere ka Kamonyi ari mu mpuzankano y’iroza ku i saa tanu n’iminota 50. Ahagaze imbere y’urukiko, Havugimana yasomewe umwirondoro yemera ko ariwo, abazwa n’umucamanza niba yemera kuburana adafite umwunganira arabyemera, abazwa ku cyaha ashinjwa niba acyemera ati ” Yego ndacyemera.”
Ubushinjacyaha bwahawe ijambo busobanura uko icyaha cyakozwe, buvuga ko Havugimana Vincent akurikiranyweho icyaha cy’ubwicanyi yakoreye umuvandi we witwa Gasimba Simoni akoresheje igice cy’icupa ; Icyaha cyakozwe mu ijoro ryo ku itariki ya 23 Ukwakira 2017 aho banyweraga inzoga basangira.
Ubushinjacyaha bwavuze ko Havugimana amaze kwica uyu muvandimwe we, yatorotse Ubutabera nyuma y’iminsi ibiri akaza kwishyikiriza polisi.
N’ubwo Havugimana yishyikirije Polisi, Ubushinjacyaha bwasobanuye ko bumusabiye icyo gihano cya burundu bushingiye ku ngiya 140 y’igitabo cy’amategeko ahana ibyaha mu Rwanda.
Bavuze ko n’ubwo yishyikirije polisi adakwiye kugabanyirizwa igihano , kuko bidakuraho ubugome yakoranye icyo cyaha , akagikora abizi neza kandi abishaka, yemwe ngo yagomgaba no kikirinda ntatere kiriya gice cy’icupa mu kico.
Ubwo yahabwaga akanya ko kugira icyo avuga ku bihano asabiwe, yagize ati ” Ndasaba imbabazi no kugabanyirizwa ibihano kuko sinabishakaga.” Nyuma yo guha buri ruhande ijambo, urukiko rwanzuye ko isomwa ry’urubanza ari tariki ya 16 Werurwe 2018, ari nabwo urubanza rwaburanishirijwe ku i saa tanu, urukiko rumuhanisha igifungo cya burundu.
Kanda kuri SUBSCRIBE ujye ubona ibiganiro n’indirimbo bishya
