Ku wa Gatanu nyuma y’umukino wa shampiyona bari bamaze gutsindamo Sunrise ibitego 3-1, abakinnyi b’ikipe ya Gasogi United batunguye Perezida w’iriya kipe, Kakooza Nkuliza Charles ‘KNC’ bamwifuriza isabukuru y’amavuko.
Gasogi United yari yasuye Sunrise kuri Stade y’i Nyagatare, ihatsindira ibitego 3-1.
Ni ibitego iyi kipe yatsindiwe na Iradukunda Jean Bertrand watsinzemo ibitego bibiri, na Ndayisenga Jean D’amour bita ‘Meya’ witsinze ku munota wa 42 w’umukino.
Sunrise FC y’umutoza Moses Basena yari yafunguriwe amazamu na Twagirimana Innocent ku gitego cyo ku munota wa 13 w’umukino.
Insinzi ya Gasogi United yahuriranye n’isabukuru ya Perezida w’iriya kipe, bituma abakinnyi bamutungura bamwifuriza isabukuru nziza y’amavuko.
Gasogi United iri mu makipe ayoboye urutonde rwa shampiyona n’amanota atatu ndetse n’ibitego bibiri izigamye, cyo kimwe n’amakipe ya Marines FC na Kiyovu Sports.
