Kuri uyu wa Gatandatu abantu barindwi bishwe na COVID-19 mu Rwanda, 204 barayandura nk’uko bigaragazwa n’imibare ya Minisiteri y’Ubuzima.
Abishwe na COVID-19 barimo abagore batatu b’i Kigali, abagabo batatu na bo b’i Kigali ndetse n’undi mugabo w’imyaka 50 w’i Gicumbi. Byatumye abamaze guhitanwa na COVID-19 mu Rwanda bagera ku 172.
Abamaze kwandura iki cyorezo bo ni 12,647 barimo 8,319 bamaze gukira, bigasobanura ko abakirwaye ari 4,156.
Abanduye kuri uyu wa Gatandatu barimo 72 b’i Kigali, 62 ba Ruhango,18 ba Gicumbi, 10 ba Rwamagana,10 ba Kirehe, barindwi ba Karongi, barindwi ba Kamonyi, batanu b’i Ngoma, bane b’i Nyagatare, batatu ba Nyamasheke, batatu ba Rubavu, babiri ba Nyamagabe n’umwe wa Gisagara.
Mu gihugu hose hamaze gufatwa ibipimo 822,515 birimo ibyafashwe uyu munsi 4,715.
