Minisiteri y’Ubuzima yatangaje ko kuri uyu wa Gatandatu hasuzumwe abantu 130 Coronavirus hakaba nta bwandu bushya bwigeze bugaragara bigatuma umubare w’abanduye uguma kuri 17.
Minisitiri w’Ubuzima Dr Ngamije Daniel yavuze ko muri rusange abantu banduye Coronavirus uko ari 17 bahuye n’abasaga 600 muribo abamaze gusuzumwa bakaba ari 467 barimo n’abasuzumwe kuri uyu wa Gatandatu 130 bangana na 60% byabo.
Minisitiri w’Ubuzima yavuze ko abanduye iki cyorezo kimwe n’abasuzumwe hafi ya bose ari abo mu Mujyi wa Kigali.
Kuva umurwayi wa mbere w’iyi ndwara yagaragara mu Rwanda Minisiteri y’Ubuzima yagiye itangaza uko iyi ndwara ihagaze umunsi ku wundi ari nako hashakishwa buri wese wahuye n’uwanduye kugirango nawe asuzumwe barebe ko atanduye.
Ibi Minisiteri y’Ubuzima yabitangaje nyuma y’amasaha make Minisitiri w’Intebe asohoye andi mabwiriza akomeye yo kwirinda Coronavirus ikomeje gufata indi ntera ku isi, aya mabwiriza akaba akubiye mu itangazo ryayo yanyujije kuri Twitter.
