Ishami ry’Umuryango w’Abibumbye rishinzwe Ubuzima ku Isi, OMS/WHO rivuga ko abantu batandatu kuri barindwi bandura virusi ya Corona muri Afurika ariko ntibamenyekane. Iyi mibare OMS ivuga ko yayigennye ishingiye ku mibare y’abantu bizwi bishwe na Coronavirus n’ibipimo byagiye bifatwa. Kugeza ubu abantu miliyoni umunani nibo bonyine bizwi ko bamaze kwandura Covid-19 muri Afurika gusa OMS yo ivuga ko imibare ya nyayo y’abanduye icyo cyorezo ari miliyoni 59. Muri rusange, abantu bonyine bapimwa ni abijyana ku bigo nderabuzima bitewe n’uko bafite ibimenyetso bya Coronavirus n’abashaka kujya hanze y’igihugu. Ibi bivuze ko abatagagaraje ibimenyetso by’ubwandu batajya kwa muganga, bityo ntibamenyekane. Ibi OMS ivuga ko virusi birushaho gukomeza gukwirakwira. Umuyobozi wa OMS ku mugabane wa Afrika, Dr Matshidiso Moeti ati “Iyo hapimwa abantu bake cyane, bituma tugendera ku mibare itariyo. Iyo abantu benshi bapimwe, bituma abantu benshi bamenya ko barwaye, bakishyira mu kato hakiri kare. Ibi bituma gukwirakwiza ubwandu bigabanuka, ubuzima bw’abantu bukarokoka muri icyo gikorwa gituma hamenyekana igikenewe n’aho gikenewe gukorwa.” Ku bw’ibyo, OMS ivuga ko ifite umugambi wo kongera ibikorwa byo gupima Coronavirus mu bihugu umunani, aho abantu bagera kuri miliyoni zirindwi mu mwaka wa 2022 bazapimwa. Muri ibyo bihugu harimo: U Burundi, Cote d’Ivoire, RD Congo, Guinea Bissau, Mozambique, Congo-Brazzaville, Senegal na Zambia. Imibare y’abandura Covid-19 yagiye igabanuka gusa OMS ivuga ko hakiri impungenge kuko abahabwa urukingo rwa Covid-19 muri Afurika bakiri bake cyane.
