Ihuriro AFC/M23 ryashyizeho Prof. Jean Baptiste Kakoma Sakatolo Zambeze ku mwanya w’Umuyobozi Mukuru wa Kaminuza ya Goma (UNIGOM), asimbuye Prof. Mughanda Muhindo CĂ©lestin wari umaze iminsi mike akuwe kuri uwo mwanya.
Ibi bikubiye mu Cyemezo No 032/COORDA-PAJD/BB/AFC-M23 cyo ku wa 29 Gicurasi 2026, cyashyizweho umukono na Bertrand Bisimwa usanzwe ari Umuhuzabikorwa Wungirije wa AFC/M23 ushinzwe ibibazo bya politiki, ubutegetsi, ubutabera na dipolomasi, mbere yo kwemezwa n’umuhuzabikorwa wa ririya huriro, Corneille Nangaa Yobeluo.
Iri shyirwaho ryabaye nyuma y’uko AFC/M23 iherutse gutangaza ko ikuye ku mirimo Prof. Mughanda Muhindo CĂ©lestin wari usanzwe ayobora Kaminuza ya Goma.
Uretse Prof. Jean Baptiste Kakoma Sakatolo Zambeze wagizwe Umuyobozi Mukuru w’iriya Kaminuza, AFC/M23 yanashyizeho abandi bagize komite nshya y’ubuyobozi bwa UNIGOM.
Barimo Prof. Richard Kabuyanga Kabuseba wagizwe Umunyamabanga Mukuru ushinzwe amasomo (Secrétaire Général Académique), Prof. Nzabandora Ndimubanzi wagizwe ushinzwe ubushakashatsi na Butotima Safari wagizwe Umunyamabanga Mukuru ushinzwe ubutegetsi.
Ni mu gihe Paluku Malisawa yahawe inshingano zo kuba Umuyobozi ushinzwe ingengo y’imari.
Mu ngingo ya gatatu y’icyo cyemezo, AFC/M23 yavuze ko ingingo zose z’amategeko cyangwa ibyemezo byari byarafashwe mbere kandi binyuranyije na cyo bivanyweho.
Ishyirwa mu bikorwa ry’iki cyemezo ryahawe Umunyamabanga Uhoraho wa AFC/M23.
Kaminuza ya Goma iri mu bigo bikomeye by’amashuri makuru bikorera mu Mujyi wa Goma, umwe mu mijyi igenzurwa na AFC/M23 kuva uyu mutwe wagura ibice ugenzura mu Ntara ya Kivu y’Amajyaruguru.
Ku wa Kane tariki ya 28 Gicurasi AFC/M23 yatangaje ko yirukanye Prof. Mughanda wari umaze igihe ayobora iyi Kaminuza, nyuma y’igihe atagaragara ku kazi.
