Umuhuzabikorwa wa politiki w’umutwe wa AFC/M23, Corneille Nangaa, yatangije gahunda yo gutera ibiti mu mujyi wa Goma, avuga ko intego ari uguhindura uwo mujyi ukaba uw’isuku, utoshye kandi wihanganira imihindagurikire y’ikirere.
Nk’uko AFC/M23 yabitangaje, iyi gahunda yatangijwe mu gihe abayobozi bayo, urubyiruko, abagore ndetse n’abaturage bakomeje ibikorwa byo gusukura aho batuye bikorwa buri wa Gatandatu mu duce bavuga ko bagenzura.
Iri huriro ryavuze ko ibikorwa by’isuku bidafatwa nk’igikorwa cy’umunsi umwe gusa, ahubwo ko ari uburyo bwo guteza imbere ubuzima rusange, kugarura icyubahiro cy’abaturage no kubaka umuryango ugira uruhare mu kubungabunga ibidukikije.
Mu muhango wo gutangiza iyi gahunda, Corneille Nangaa yari aherekejwe n’intumwa nyinshi za AFC/M23, aho bitabiriye ibikorwa by’isuku mbere yo gutangiza gahunda yo gutera ibiti ku buryo bwagutse.
Nangaa yavuze ko gahunda yo gutera ibiti igamije gutuma Goma iba umujyi utoshye.
Yagize ati: “Twaje muri iki gitondo kugira ngo dushyire mu bikorwa gahunda y’isuku. Ariko iki gihe biratandukanye kuko dushaka no gutera ibiti. Turashaka ko umujyi wa Goma uba umujyi usukuye kandi utoshye.”
Yakomeje avuga ko hari gahunda yateguwe yo gutera ibiti ku mihanda minini ndetse no mu bice bigenewe kongera amashyamba.
Ati: “Kugira ngo umujyi utohe, twateguye gahunda yuzuye yo gutera ibiti ku mihanda minini ndetse no mu bice bizaterwamo amashyamba. Turashaka umujyi usukuye, ufite isuku kandi utoshye.”
AFC/M23 yavuze ko ibikorwa byo gutera ibiti byatangiriye ku muhanda wa Sake, aho biteganyijwe ko hagomba guterwa ibiti ibihumbi byinshi.
Iri huriro ryavuze ko mu cyiciro cya mbere uteganya gutera ibiti bigera ku 50,000.
Nangaa yavuze ko iyi gahunda izakomeza mu gihe kirekire hagamijwe gufasha mu kurwanya ingaruka z’imihindagurikire y’ikirere no kongera ibimera mu mujyi wa Goma.
Ku bijyanye n’uko ibikorwa by’iterambere bihuzwa n’ibikorwa by’umutekano, Nangaa yavuze ko ibikorwa bya AFC/M23 bitagarukira ku byerekeye igisirikare gusa.
Ati: “Ntabwo ari umurongo wa gisirikare gusa, ahubwo ni n’umurongo w’iterambere muri rusange. Ibyo ni byo dushaka kuvuga.”
AFC/M23 yavuze ko ibikorwa byo gusukura imihanda, kwita ku hantu hahurira abantu benshi no kurengera ibidukikije biri mu byo ibona nk’ibikorwa by’ubuyobozi bugira aho buhuriye n’abaturage.
