Afurika y’Epfo: Abapolisi barenga 7,000 bamaze kwandura Covid-19

Minisitiri wa Polisi ya Afurika y’Epfo, Bheki Cele, yatangaje ko Abapolisi 7,021 bo muri icyo gihugu bamaze kwandura icyorezo cya Virusi ya Corona.

Minisitiri Bheki Cele yemeje ayo makuru ku wa gatatu tariki ya 15 Nyakanga, mu kiganiro yagiranye n’Itangazamakuru rya Afurika y’Epfo cyabereye mu murwa mukuru, Pretoria. Ni ikiganiro cyibanze ku ngamba icyo gihugu giteganya gufata mu rwego rwo kugabananya ikwirakwizwa rya Covid-19 ikomeje kucyoreka.

Minisitiri wa Polisi ya Afurika y’Epfo yagize ati: “Iki cyorezo cya COVID-19 ntabwo kivangura, ntawe ugikingiwe; ndetse kinataka n’abo twizera ko bashinzwe kuturinda. Umubare munini w’abashinzwe ubutabera, gukumira ibyaha ndetse n’inzego z’umutekano baranduye.”

Uriya mu Minisitiri yavuze ko muri Afurika y’Epfo hari Abapolisi 4,949 police bamaze gushyirwa mu muhezo, mu gihe ababarirwa mu 150 bajyanwe mu bitaro.

Minisitiri Cele yongeyeho ko mu magereza yo muri Afurika y’Epfo hamaze kubonekamo abanduye 3,688, barimo abagororwa 1,485 ndetse n’abacungagereza 2,203, yungamo ati: “Abagororwa 15 n’abacungagereza 31 barapfuye ndetse n’abapolisi 53 na bo barapfuye. Tuzahagarika kwanduzanya mu gihe tuzabigira inshingano muri iki cyorezo.”

Kugeza ubu, muri Afurika y’Epfo harabarurwa abantu barenga 311,000 banduye COVID-19, mu gihe abo icyo cyorezo kimaze guhitana barenga 4,500.