Ikipe ya Al Merriekh yatangajwe nk’iyegukanye igikombe cya Sudan Premier League 2025/26, nyuma y’uko Komisiyo y’Ubujurire mu Ishyirahamwe ry’Umupira w’Amaguru muri Sudani ifashe icyemezo cyo kwambura igikombe Al Hilal hari yacyegukanye.
Icyemezo cyafashwe nyuma y’ubujurire bwatanzwe na Al Merriekh, yashinjaga mukeba wayo Al Hilal kutubahiriza amategeko agenga umubare w’abakinnyi b’abanyamahanga bemerewe gukina umukino umwe.
Amategeko ya shampiyona ya Sudani ateganya ko ikipe itemerewe gukinisha abanyamahanga barenze batanu mu mukino umwe.
Icyakora, mu mukino wa derby wahuje Al Hilal na Al Merriekh, Al Hilal yashinjwe gukinisha abanyamahanga umunani, bituma Al Merriekh itanga ikirego.
Komisiyo y’Ubujurire yemeje ko icyo kirego gifite ishingiro, ihindura ibyavuye muri uwo mukino, bituma Al Merriekh ifatwa nk’iyawutsinze ku bitego 2-0 ndetse iyi kipe ihabwa amanota atatu.
Iri hinduka ryatumye Al Merriekh isoza shampiyona ifite amanota 21, irusha Al Hilal yasigaye ifite amanota 18, bityo ihita itangazwa nk’iyatwaye wa Sudan Premier League 2025/26 ku nshuro ya 36 mu mateka yayo.
Nyuma y’iki cyemezo, Al Hilal yasohoye itangazo yamagana ibyakozwe na Komisiyo y’Ubujurire, ivuga ko yegukanye igikombe mu buryo bukurikije amategeko no ku musaruro yabonye mu kibuga.
Iyi kipe yavuze ko icyemezo cyafashwe “kinyuranyije n’amategeko, kandi ko cyambuye uburenganzira bwayo mu buryo budakurikije amategeko ya Sudani.”
Al Hilal yanibukije ko atari ubwa mbere ihuye n’urubanza nk’urwo, ivuga ko no mu gihe cy’uwahoze ari Perezida wayo, Salah Idris, yigeze gutsinda urubanza nk’uru rwari rufitanye isano n’umukinnyi Soli Chérif.
Ubuyobozi bwa Al Hilal bwatangaje ko butazemera gutakaza ibyo bwagezeho, bushimangira ko buziga neza umwanzuro wa Komisiyo y’Ubujurire bukimara kuwubona mu nyandiko, hanyuma bugafata izindi ngamba z’amategeko.
