Amavubi yasuzugurikiye imbere ya St Eloi Lupopo yo muri RDC

Ikipe y’Igihugu ‘Amavubi’ kuri uyu wa Kabiri yatsinzwe na St Eloi Lupopo yo muri Repubulika Iharanira Demokarasi ya Congo ibitego 3-1, mu mukino wa gicuti amakipe yombi yari yahuriyemo.

Ni umukino wabereye kuri Stade ya El Arb Zaouli muri Maroc.

Uyu mukino wari uwa kabiri wa gicuti iyi kipe y’umutoza Carlos Alos Ferrer ikinnye, nyuma yo kugwa miswi na Nzalang Nacional ya Guinée-Equatoriale 0-0 mu mukino wabaye mu mpera z’icyumweru gishize.

Ibitego birimo icya Josué Kazema cyo ku munota wa karindwi w’umukino, ndetse na bibiri bya Jean Marc Mukasu ni byo byafashije St Eloi Lupopo kwihaniza Amavubi amaze kwinjiza ibitego bibiri byongine mu mikino itandatu aheruka gukina atozwa na Carlos Ferrer.

Iyi kipe yabonye impozamarira ku munota wa 28 w’imikino ibifashijwemo na myugariro Ndayishimiye Thierry.