Ikipe y’Igihugu ‘Amavubi’ yabuze itike ya CHAN 2023 igomba kubera mu gihugu cya Algeria, nyuma yo gutsindirwa imbere y’abafana bayo na Ethiopia igitego 1-0.
Amavubi kuri uyu wa Gatandatu yari yakiriye The Walia ya Ethiopia kuri Stade Mpuzamahanga ya Huye, mu mukino wo kwishyura w’ijonjora ryo gushaka itike ya CHAN 2023 igomba kubera muri Algeria.
Igitego cya Coup-Franc yo ku munota wa 23 Dawa Hutessa Dukele ni cyo cyatandukanyije impande zombi, nyuma y’uko amakipe yombi yari yaguye miswi 0-0 mu mukino ubanza wari wabereye i Dar es Salaam muri Tanzania.
Kimwe no mu mukino ubanza, nta gikomeye abasore n’umutoza Carlos Ferrer bigeze bakora muri uyu mukino n’ubwo bari bagerageje kotsa igitutu Ethiopia mu gice cya kabiri cy’umukino.
