Uwahoze ari Perezida wa Leta Zunze Ubumwe za Amerika, Barack Obama yanenze bikomeye Perezida Donald Trump wamusimbuye kubera “ibintu birimo ubusazi biri kubera mu biro bya perezida w’Amerika bya White House.”
Mu kiganiro yatangiye muri Kaminuza ya Illinois yo muri Amerika Barack Obama yagize ati:”Ibi ntibisanzwe, ibi ni ibihe bidasanzwe kandi ni ibihe bibi cyane.”
Yakomeje asaba ko “hasubiraho ukuvugisha ukuri no gushyira mu gaciro no gukurikiza amategeko muri leta yacu.”
Uyu wahoze ari perezida wa Leta Zunze Ubumwe za Amerika kuva yava ku butegetsi yakomeje kutagira byinshi avuga bijyanye n’ubuzima bw’igihugu, ariko kuri iyi nshuro ntiyabashije kwifata.
Kuri uyu wa Gatanu,itariki 07 Nzeri nibwo Barack Obama yabwiye abari bitabiriye umuhango wo gutanga ibihembo mu mujyi wa Urbana muri leta ya Illinois, ko yari amaze igihe ashaka gukurikiza umugenzo w’abayoboye Amerika wo kutagira ibyo batangaza bijyanye na politiki y’igihugu bamaze kuva ku butegetsi.
Ariko yahisemo kunenga bikomeye ubutegetsi buriho kuri ubu muri Amerika bw’abo mu ishyaka ry’abarepubulikani.
Mu kumusubiza, Perezida Trump wari mu gikorwa cyo gukusanya inkunga ku wa Gatanu i Fargo muri North Dakota, yavuze ko yakurikiye ijambo ry’uwo yasimbuye, ati: ” Ariko nahise nsinzira .”
Bwana Trump yongeyeho ko Bwana Obama yari arimo kugerageza kwiyitirira ” ibintu bitangaje igihugu cyacu kiri kugeraho .”
Â
