Leta zunze ubumwe za Amerika ziravuga ko aba hackers bo mu Bushinwa bari kugerageza kwiba amakuru yerekeye ubushakashatsi ziri gukora ku rukingo n’umuti wa Covid-19.
Byatangajwe n’ibiro by’Abanyamerika bishinzwe iperereza (FBI), bivuga ko byabonye ibimenyetso by’uko hari abari kugerageza kwiba amakuru mu bigo by’Abanyamerika biri gukora ubushakashatsi ku rukingo n’umuti bya Covid-19.
Itangazo ryasohowe na FBI ku bafatanye n’ishami rishinzwe kurinda amabanga abitse mu buryo bw’ikoranabuhanga (Cisa) ku munsi w’ejo, ryaburiraga ibigo biri gukora ubushakashatsi kuri iriya miti ko hari abari kugerageza kubyinjirira.
Itangazo rikomeza rigira riti ” Ibisambo byifashishije ikoranabuhanga byagaragaye bigerageza kumenya no kubona mu buryo butemewe umutungo w’ubwenge n’amakuru y’ubuzima rusange” ku bushakashatsi buri gukorwa kuri Coronavirs. Ni mu gihe ibihugu byombi binashinjanya kugira uruhare mu ikwirakwira rya Covid-19 imaze kwandurwa n’abarenga 4,300,000 ku isi yose.
Amerika inashinja kenshi Ubushinwa kugerageza kuyinjirira, gusa ni kenshi Leta ya Beijing yakunze guhakana ibirego bya Washington.
Ku wa mbere w’iki cyumweru ubwo Perezida Donald Trump wa Leta zunze ubumwe za Amerika yaganiraga n’itangazamakuru, yavuze ko kuba Ubushinwa bugerageza kwiba amakuru ya Amerika bwifashishije ikoranabuhanga “nta gishya kibirimo.”
Mu ntangiriro z’iki cyumweru umuvugizi wa Minisiteri y’Ububanyi n’amahanga y’Ubushinwa, Zhao Lijian, we yavuze ko gushinja Ubushinwa ibirego by’ibinyoma bidafite gihamya ari ‘amahano’.
Yagize ati” Tuyoboye Isi mu gukora ubushakashatsi ku rukingo n’umuti wa Covid-19. Ni amahano kwibasira Ubushinwa hifashishijwe ibihuha n’amagambo yo gusebanya nta gihamya cyabyo.”
Si ubwa mbere Amerika ishinja Ubushinwa kuyiba amakuru. Mu 2009 yavuze ko aba hackers b’Abashinwa bashoboye gucengera mu makuru yihariye yavuye mu ndege y’intambara ya Lockheed Martin F-35, Nyuma yaho gato Ubushinwa bugatangaza ko buri gukora indege nka yo bwise “Shenyang J-31”.
Amerika kandi yakunze kumvikana ishinja Ubushinwa gukoresha Abanyabwenge bayo bakiba amakuru mu nganda zayo.
