Nyuma y’iminsi yaranzwe n’ibitero no kwihimura hagati ya Leta Zunze Ubumwe za Amerika na Iran, impande zombi zamaze kumvikana guhagarika imirwano no gusubukura ibiganiro bigamije gukemura amakimbirane afitanye isano na Hormuz, imwe mu nzira z’ingenzi zicishwamo peteroli ku isi.
Nk’uko umuyobozi wo muri Leta ya Amerika yabitangaje, impande zombi zemeranyije guhagarika ibikorwa bya gisirikare mu gihe ibiganiro bya tekiniki bikomeje ku ngingo 14 zikubiye mu masezerano y’agateganyo yasinywe ku wa 17 Kamena 2026. Aya masezerano yari agamije kongera gufungura umuhora wa Hormuz kugira ngo amato yongere kuyinyuramo mu bwisanzure.
Biteganyijwe ko ibiganiro bizasubukurwa ku wa Kabiri muri Qatar.
Imirwano yari yongeye kubura
Iyi ntambwe itewe nyuma y’uko mu minsi ishize habayeho ibitero bikomeye hagati y’impande zombi. Iran yarashe misile n’indege zitagira abapilote ku birindiro bya gisirikare by’Amerika biri muri Bahrain na Kuwait, ishinja Washington kutubahiriza amasezerano yo guhagarika imirwano.
Ku rundi ruhande, Amerika nayo yari yongeye kugaba ibitero kuri Iran nyuma y’uko ubwato bw’ubucuruzi bwibasiwe muri Hormuz.
Perezida wa Amerika, Donald Trump, yari yanatangaje ko ashobora “kurangiza burundu icyo gikorwa cya gisirikare” mu gihe Iran yakomeza kutubahiriza ibyo yumvikanyeho na Amerika. Yanavuze ko Iran ishobora “guhagarikwa kubaho nk’ubutegetsi buriho” mu gihe amakimbirane yakomeza.
Nta gihombo gikomeye cyatangajwe
Abayobozi ba Amerika batangaje ko nubwo ibirindiro byayo byarashwe, nta musirikare wayo wapfuye cyangwa ngo hagire ibikorwaremezo bikomeye byangirika.
Kuwait nayo yatangaje ko ingabo zayo zashoboye kurasa no guhanura misile ebyiri za ballistique, mu gihe Bahrain yavuze ko indege itagira umupilote yateje ibyangiritse ku nyubako y’abaturage ariko nta muntu wahitanywe na yo.
Israel nayo yakomeje ibitero
Mu gihe Amerika na Iran ziri gushaka inzira yo gusubira ku meza y’ibiganiro, Israel yatangaje ko yongeye kugaba ibitero ku birindiro by’umutwe wa Hezbollah ushyigikiwe na Iran mu majyepfo ya Lebanon.
Iran yo ivuga ko amahoro arambye azashoboka gusa niba n’imirwano iri muri Lebanon ihagaritswe.
