Leta Zunze Ubumwe za Amerika zatangaje ko gahunda yo gusaba bamwe mu bagenzi baturuka mu bihugu bimwe na bimwe gutanga ingwate (visa bond) mbere yo guhabwa visa y’ubukerarugendo cyangwa iy’urugendo rw’akazi (B1/B2) igizwe gahunda ihoraho.
Iyo gahunda ishobora gusaba bamwe mu basaba visa baturuka mu bihugu 50 byo hirya no hino ku isi, birimo 30 byo muri Afurika, gutanga ingwate ishobora kugera ku madolari ya Amerika 20,000 mbere yo kwemererwa kwinjira muri Amerika.
Nk’uko amakuru yatangajwe na DW Africa abivuga, iyo ngwate ntabwo iba ari amafaranga yishyurwa burundu. Uyatanze ayagarurirwa mu gihe avuye muri Amerika mbere y’uko visa ye irangira kandi akaba yarubahirije amategeko yose agenga iyo visa.
Ariko iyo umuntu arengeje igihe yemerewe kuguma muri Amerika (overstay) cyangwa agahonyora andi mabwiriza ya visa ye, ayo mafaranga ahita atakara, akagumana na Leta ya Amerika.
Ibihugu 30 bya Afurika birebwa n’iyi gahunda
Mu bihugu bya Afurika biri kuri uru rutonde harimo Nigeria, Algeria, Angola, Benin, Botswana, u Burundi, Cabo Verde, Central African Republic, Côte d’Ivoire, Djibouti, Ethiopia, Gabon, Gambia, Guinea, Guinea-Bissau, Lesotho, Malawi, Mauritania, Mauritius, Mozambique, Namibia, São Tomé and Príncipe, Senegal, Seychelles, Tanzania, Togo, Tunisia, Uganda, Zambia na Zimbabwe.
Biragaragara ko u Rwanda na Repubulika Iharanira Demokarasi ya Congo (RDC) bitari kuri uru rutonde.
Kuki Amerika yafashe uyu mwanzuro?
Iyi gahunda igamije kugabanya umubare w’abinjira muri Amerika bakarenza igihe visa yabo ibemerera kuhaguma cyangwa bakica amategeko agenga abimukira.
Leta ya Amerika isanga iyo ngwate ishobora gutuma abasaba visa barushaho kubahiriza amategeko kuko baba bazi ko nibayarenza bazatakaza amafaranga menshi.
Ese buri wese azishyura 20,000$?
Oya. Ntabwo buri wese uzasaba visa muri ibyo bihugu azasabwa gutanga ayo mafaranga. Ingano y’ingwate igenwa n’inzego za dipolomasi za Amerika hashingiwe ku isesengura rya buri dosiye n’ibyago byo kutubahiriza amategeko ya visa.
Amafaranga ashobora kuba ari make cyangwa akagera ku 20,000$ bitewe n’imiterere y’imiterere ya dosiye.
Icyo bisobanuye ku bagenzi
Nubwo gahunda ishobora gutuma bamwe bagira impungenge, ntabwo isimbura ibisabwa bisanzwe kugira ngo umuntu ahabwe visa.
Ahubwo ni indi ngamba y’inyongera ishobora gukoreshwa ku basaba visa bamwe na bamwe, cyane cyane aho Amerika ibona hari ibyago byinshi byo kutubahiriza amategeko agenga visa.
Iyi politiki ishobora kugira ingaruka ku bagenzi baturuka mu bihugu biri ku rutonde, cyane cyane abafite ubushobozi buke bwo kubona amafaranga menshi asabwa nk’ingwate, nubwo ayo mafaranga ashobora gusubizwa igihe amategeko yose yubahirijwe.
