Abagore bo mu ntara ya Amhara mu gihugu cya Ethiopia, barashinja abarwanyi bo mu mutwe wa TPLF kubahohotera bikabije, harimo no kubasambanya ku ngufu.
Icyegeranyo gishya cyashyizwe hanze n’ishyirahamwe mpuzamahanga riharanira uburenganzira bwa muntu, Amnesty International, kivuga ko hari abagore bayihaye ubuhamya bw’uko abarwanyi ba TPLF babasambanya ku ngufu rimwe na rimwe babafatiyeho imbunda.
Uyu mutwe w’ishyaka riyoboye intara ya Tigray ibarizwa mu majyaruguru ya Ethiopia, umaze umwaka uri mu ntambara n’ingabo za Leta ya kiriya gihugu.
Abagore 16 babajijwe na Amnesty bavuze ko mu gufatwa ku ngufu bakorerwa ibya mfura mbi na bariya barwanyi ba TPLF, ndetse bakanababwira amagambo mabi ndetse anakomeretsa ashingiye ku moko.
Raporo ya Amnesty International inavuga ko uretse gusambanya abagore ku ngufu, abarwanyi ba TPLF banasenyaguye amavuriro y’ahitwa Nifas Mewcha ari na ho abasambanyijwe babaga.
Bamwe mu bagore bavuganye n’iri shyirahamwe bavuga ko bafatiwe ku ngufu mu maso y’abana babo, uyu muryango ukavuga ko abo wabashije kumenya bakorewe aya mabi bagera kuri 73.
Umunyamabanga mukuru wa Amnesty International mu Bwongereza ari na yo yakoze iri perereza, yavuze ko amabi TPLF yakoreye abo bagore ashobora kujya mu cyiciro cy’ibyaha by’agahomamunwa kandi birenze kamere.
Iri shyirahamwe ryasabye TPLF gukora iperereza ku byaha abarwanyi bayo baregwa, gusa uyu mutwe ukaba warakunze kubyamaganira kure.
