Ikipe ya Arsenal yabonye intsinzi ya mbere muri uyu mwaka w’imikino, nyuma yo kunyagira West Bromwich Albion ibitego 6-0 mu mukino wa English Football League (Carabao Cup).
Ibitego birimo bitatu byatsinzwe na Kapiteni Pierre-Emerick Aubameyang, ibya Nicolas Pepe, Bukayo Saka na Alexandre Lacazzette; byari bihagije kugira ngo Arsenal ibone intsinzi ya mbere muri season.
Ni nyuma y’uko iyi kipe y’i Londres yaherukaga gukura abafana bayo imitima yandika amateka mabi yo gutsindwa imikino ya mbere ifungura shampiyona.
Bigitangira Arsenal yatsinzwe na Brentford yazamutse mu kiciro cya mbere ibitego 2-0 mu mukino w’umunsi wa mbere wa shampiyona, mbere yo gusubirwa na Chelsea na yo yayisanze ku kibuga cyayo ikahayitsindira ibitego 2-0 ku munsi wa kabiri wa Premier league.
Kuba Arsenal yari imaze imikino ibiri ya shampiyona itinjiza igitego yaraye itsinze bitandatu, abafana b’iyi kipe babihuje no kuba ari umusingi mwiza iyi kipe ikwiye kubakiraho no mu yindi mikino ifite mu minsi iri imbere.
Abafana ba Arsenal bazamenya niba icyizere bafite atari icyo kuraza amasinde ku gicamunsi cyo ku wa Gatandatu, ubwo ikipe yabo izaba yasuye Manchester City mu mukino w’umunsi wa gatatu wa Premier league.
Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
