Ikipe ya AS Kigali yatsinze APR FC ibitego 2-0, mu mukino ubanziriza uw’umunsi wa nyuma wa shampiyona wabaye kuri uyu wa Mbere.
Amakipe yombi yari yahuriye kuri Stade ya Kigali i Nyamirambo, mu mukino iyi kipe y’Ingabo z’igihugu yasabwaga gutsinda igahita itangira gukoza imitwe y’intoki ku gikombe cya shampiyona.
APR FC yatangiye umukino yotsa igitutu cyinshi AS Kigali, ku buryo mu minota 25 ya mbere y’umukino yari yamaze kubona byibura uburyo bune bukomeye imbere y’izamu rya AS Kigali.
Abarimo Omborenga Fitina, Bizimana Yannick na Mugisha Gilbert bose babonye uburyo bukomeye, gusa AS Kigali igenda irokorwa n’umunyezamu Ntwari Fiacre.
Byasabye umunota wa 34 w’umukino ngo AS Kigali y’umutoza Cassa Mbungo AndrĂ© ifungure amazamu biciye kuri Kapiteni Haruna Niyonzima, nyuma yo gucengagura ba myugariro ba APR FC.
Iki gitego ni cyo cyatandukanyije impande zombi mu minota 45 y’igice cya mbere cy’umukino.
Iminota ya mbere y’igice cya kabiri cy’umukino yaranzwe no gusatira ku ruhande rwa APR FC, gusa inanirwa kumenera mu rukuta rwa AS Kigali ngo yishyure igitego yari yatsinzwe.
Iyi kipe y’Abanyamujyi yacishagamo igasatira iy’Ingabo z’igihugu, yashoboraga gutsinda igitego cya kabiri ubwo Shabani Hussein ‘Tchabalala’ yateraga umupira n’umutwe ukagarurwa n’igiti cy’izamu.
AS Kigali yashimangiye intsinzi ku munota wa 86 w’umukino ubwo Kakule Mugheni Fabrice yamburaga umupira Ruboneka Jean Bosco, akawinjirana mu rubuga rw’amahina mbere yo kuwushyira mu izamu rya Ishimwe Pierre.
APR FC n’ubwo yatsinzwe uyu mukino iracyayoboye urutonde rwa shampiyona n’amanota 63, irusha rimwe Kiyovu Sports iyikurikiye.
Iyi Kiyovu yakabaye ifata umwanya wa mbere ikaniyongerera amahirwe yo gutwara igikombe, gusa inanirwa gutsindira Espoir FC i Rusizi kuko amakipe yombi yaguye miswi 0-0.
Umunsi wa 29 wa shampiyona kandi wasize Rayon Sports isubiriwe na Marines FC, iyitsindira kuri Stade Umuganda ibitego 3-2.
Rutahizamu Mico Justin yari yashoboye gutsindira Rayon Sports ibitego bibiri mu gice cya mbere cy’umukino, gusa Mugisha DesirĂ© na Ishimwe Fiston watsinze ibitego bibiri baza guhesha Marines intsinzi.
