Aubameyang wajugunywe na Arsenal yatsindiye Barcelone Hat trick mu mukino wa mbere yayikiniye yabanje mu kibuga

Umunya-Gabon Pierre-Emerick Aubameyang yatsindiye FC Barcelona ibitego bitatu wenyine, mu mukino wa mbere wa shampiyona ya Espagne yayikiniye yabanje mu kibuga.

Hari mu mukino w’umunsi wa 25 wa shampiyona ya Espagne iyi kipe y’i Catalunya yari yasuyemo FC Valence i Mestalla ejo ku Cyumweru, ihayinyagirira ibitego 4-1.

Wari umukino wa gatatu Aubameyang yakiniraga FC Barcelone kuva yayigeramo muri Mutarama uyu mwaka atijwemo na Arsenal kubera ubwumvikane bwari hagati ye n’umutoza Mikel Arteta.

Pierre-Emerick Aubameyang yaherukaga yari yaragaragaye mu mikino Barcelone yari yarakinnyemo n’amakipe ya Atlético Madrid na Espanol Barcelone; gusa yombi yagiye yinjira mu kibuga asimbura.

Umunota wa 23 w’umukino wari uhagije ngo uyu munya-Gabon afungurire FC Barcelone amazamu, mbere yo kuyitsindira igitego cya gatatu ku munota wa 38 cyaje gikurikira icy’Umuholandi Frenkie De Jong.

Aubameyang yatsindiye FC Barcelone agashinguracumu ku munota wa 63 w’umukino cyaje gikurikira icyo Carlos Soler yari amaze gutsindira Valence.

Ku ikubitiro igitego cya FC Barcelone cyari cyanditswe kuri Pedri Gonzalez, gusa raporo y’umusifuzi yasohotse nyuma y’umukino yemeza ko cyatsinzwe na Aubameyang nyuma yo guhindurira icyerekezo umupira watewe na Pedri.

Gutsinda Valence byatumye FC Barcelone ifata umwanya wa Kane ku rutonde rwa shampiyona n’amanota 42 inganya na Atlético Madrid iyikurikiye.

Iyi kipe kuri ubu irarushwa amanota amanota 15 na Real Madrid ya mbere, gusa iracyafite umukino w’ikirarane igomba gukina.