Ba Perezida 3 b’ibihugu bya EAC bagiye gushyingura umwamikazi Elizabeth II

Ba Perezida batatu b’ibihugu bitatu muri birindwi bigize Umuryango wa Afurika y’Iburasirazuba (EAC), bari i Londres mu Bwongereza aho bitabiriye umuhango wo gutabariza [gushyingura] umwamikazi Elizabeth II.

Kuri uyu wa Mbere tariki ya 19 Nzeri ni bwo Umwamikazi Elizabeth II w’u Bwongereza atabarizwa, mu muhango ubera ahitwa Westminster Abbey.

Ni umuhango byitezwe ko witabirwa n’abashyitsi babarirwa mu 2,200; barimo na Perezida Paul Kagame usanzwe ari n’umuyobozi w’Umuryango wa Commonwealth umwamikazi Elizabeth II yari abereye Umuyobozi w’Icyubahiro.

Perezida Kagame uri i Londres kuva ku gicamunsi cy’ejo ku Cyumweru, ibiro bye kuri Twitter byatangaje ko yanditse ubutumwa bwihanganisha umuryango w’ubwami bw’u Bwongereza mu gitabo cy’abashyitsi cyateguwe mu nyubako yakirirwamo abanyacyubahiro izwi nka Lancaster House.

Perezida Kagame yagiye gushyingura Umwamikazi Elizabeth II mu gihe yaherukaga kuganira kuri terefoni n’umuhungu we Charles III ari na we wamusimbuye ku ngoma, mu rwego rwo kumwihanganisha.

I Londres Perezida Paul Kagame yagezeyo ahasanga ba Perezida Samia Suluhu Hassan wa Tanzania cyo kimwe na Dr William Samoei Ruto wa Kenya na bo bitabiriye umuhango wo gutabariza umwamikazi Elizabeth II.

Uretse aba-perezida bo muri EAC, mu bandi banyacyubahiro bitabiriye uriya muhango barimo Perezida Joe Biden wa Leta Zunze Ubumwe za Amerika, Emmanuel Macron w’u Bufaransa, Frank-Walter Steinmeier w’u Budage, Sergio Mattarellaand w’u Butaliyani na Taoiseach Micheal Martin wa Ireland.

Barimo kandi Minisitiri w’Intebe wa Canada, Justin Trudeau, Anthony Albanese wa Australia, Jacinda Ardern wa Nouvelle-Zealand, Sheikh Hasina wa Bangladesh na Perezida Ranil Wickremesinghe wa Sri Lanka.

Ibihugu nk’u Buhinde biraza kuba bihagarariwe na Perezida Droupadi Murmu mu gihe u Bushinwa bwohereje Wang Qishan usanzwe ari Visi-Perezida wabwo.