Shampiyona zitandukanye zikinamo abakinnyi bakinira ikipe y’igihugu ‘Amavubi’ zarakomeje mu mpera z’icyumweru gishize, benshi mu bakinnyi b’Amavubi bakina muri izi shampiyona bitwara neza ndetse bafasha amakipe yabo kwegukana amanota atatu.
Duhereye mu gihugu cya Tanzania ahabarizwa Meddie Kagere ukinira ikipe ya Simba, bakiriye mu rugo kuri iki cyumweru ikipe ya Ruvu Shooting maze bayinyagira ibitego 4-1.
Kagere yari yabanje mu kibuga n’ubwo atabashije kureba mu izamu. Kugeza ubu Simba ni iya kabiri n’amantoa 46, inyuma ya Young Africans ya mbere ifite amanota 56.
Muri Maroc naho hakina ba myugariro b’Amavubi, Manzi Thierry na Manishimwe Emmanuel bakinira ikipe ya FAR Rabat.
Ku wa Gatandatu bari bakiriye mu rugo ikipe Rapide Oued Zem, maze babasha kuyitisnda ibitego 3-1. Manzi na Imanishimwe bombi bari babanje mu kibuga, ndetse Manzi Thierry niwe watsindiye Far Rabat igitego cya mbere cyo kwishyura ku munota wa 53.
Kugeza ubu FAR Rabat iri ku mwanya wa gatatu n’amanota 34, ikaba irushwa na Wydad Casablanca ya mbere amanota 15.
Muri Portugal mu cyiciro cya kabiri ho hakina myugariro Mutsinzi Ange Jimmy ukinira ikipe ya CD Trofense.
Ejo ku cyumweru bari bakiriye mu rugo ikipe ya Academica maze babasha kuyitsinda ibitego 2-1, mu gihe iyi shampiyona iri kugana ku musozo ikipe ya Trofense iri kurwana no kutamanuka mu cyiciro cya 3; dore ko kugeza ubu Trofense iri kumwaya wa 14 n’amanota 37. Irarusha amanota 4 Covilha ibanziriza iziri mu murongo utukura, mu gihe Rio Ave ariyo ya mbere n’amanta 67.
Mu gihugu cya Norvège mu cyiciro cya kabiri hakina umunyezamu Buhake Twizere Clement ukinira Strommen.
Ku wa Gatandatu bari bakiriye ikipe ya Ullern maze bayitsinda ibitego 2-0. Clement yari yabanje mu kibuga kandi nibura imikino itanu yose kuva iyi shampiyona yatangira niwe muzamu wa mbere ubanza mu kibuga.
Muri iyi shampiyona kugeza ubu Strommen ni iya gatanu n’amanota icyenda, ikarushwa na Moss yambere amanota atandatu.
Mu cyiciro cya kabiri muri Suède ho hakina rutahizamu Rafael York wa AFC Skilstuna. Mu mpera z’icyumweru gishize bari bakiriye ikipe ya Vasteras SK, maze bayitsinda ibiteg 5-2.
York ntiyabashije gukina uyu mukino kubera ikarita y’umutuku yahawe, gusa ku munsi wa 6 wiyi shampiyno York amaze gutsinda ibitego bibiri ndetse yanatanze umupira wavuyemo igitego, akaba ari n’umukinnyi ngenderwaho muri iyi kipe.
Kugeza ubu EFC Skilstuna ni nayo yambere n’amanota 15, ikarusha Brage iyi kurikiye n’amanota 13.
