Perezida wa Brazil, Jair Bolsonaro nyuma y’aho atangarije ko yanduye Koronavirusi, akomeje kugaragara mu ruhame atubahirije ingamba zo kwirinda kwanduza abandi iki cyorezo.
Mu kiganiro yagiranye na Televiziyo y’igihugu cya Brazil, Perezida yakomeje kugaragara atambaye agapfuka munwa. Ibi binahurirana n’ibyo yagiye atangaza kuri iki cyorezo. Aho yasabaga abanya-Brazil kwihatira gukora siporo, cyane ko yasangaga ari yo nzira yonyine yafasha kwirinda Koronavirusi we yita ibicurane bisanzwe.
Bolsonaro yafashe umwanzuro wo kujya kwipimisha, nyuma yaho ku Cyumweru yagaragaje ibimenyetso bikomeye bya Koronavirusi, birimo kubabara mu hihogo n’umuriro mwinshi.
Ku wa Mbere nibwo yatangaje ko ibizamini bamufashe byagaragaje ko yanduye Covid-19.Perezida Bolsonaro ni umwe mu banya-Brazil bakabakaba miliyoni 2 bamaze kwandura Civid-19.
Imibare mishya itangazwa n’abashinzwe ubuzima muri Brazil yasohotse ku munsi w’ejo tariki ya 7 Nyakanga, igaragaza ko 12,000 ari bo bashya banduye koronavirusi ku wa 6 Nyakanga. Kuri uwo munsi kandi Brazil yapfushije abantu 400.
Abantu bagera kuri miliyoni 1.9 bamaze kwandura Koronavirusi, abagera ku bihumbi 66,686 imaze ku bahitana, mu gihe abamaze gukira bagera kuri miliyoni 1.07.
