Abakozi babiri b’Ikigo cy’Igihugu gishinzwe Amaposita mu Burundi (RNP) batawe muri yombi bafungirwa i Muramvya, mu Ntara ya Gitega (mu Burundi rwagati), mu gihe uwa gatatu yahunze, bakaba bashinjwa kunyereza hafi miliyoni 500 y’Amarundi.
Nk’uko ubuhamya buturuka aho buvuga, Fulgence Manirambona, Umuyobozi w’ishami rya RNP i Muramvya, yatawe muri yombi ku itariki ya 26 Nzeri 2025, mbere yo kujyanwa kuri sitasiyo ya polisi mu ntara.
Nyuma y’iminsi itatu, Mireille Ndayikeza, umucungamutungo w’ishami rya RNP i Shombo, na we yarafashwe afungirwa ahantu hamwe n’uwa mbere.
Muri iyo dosiye kandi, Ancile Muhuragiza, umukozi wa RNP i Muramvya, we yarahunze n’ubu yaburiwe irengero nk’uko inkuru dukesha SOS Medias Burundi ivuga.
Aba bakozi batatu barashinjwa kunyereza amafaranga agenewe kugura ifumbire mvaruganda hamwe n’amafaranga yatanzwe n’abahinzi mu gihembwe cya mbere cy’ihinga.
Bivugwa ko ifatwa ryabo ryahungabanyije cyane imikorere y’inzego za RNP i Shombo na Muramvya, cyane cyane bigira ingaruka ku itangwa ry’imishahara y’abakozi ba Leta no gukwirakwiza imbuto z’indobanure z’ibigori.
Umuyobozi wa Komini ya Muramvya, Éric Nkurunziza, yatangaje ko ubu ibintu “byasubiye mu buryo” nyuma yo kohereza abakozi baziba icyuho baturutse i Bujumbura na Gitega, mu mirwa mikuru y’igihugu.
