Abantu bataramenyekana mu ijoro ryacyeye ku Cyumweru tariki ya 10 Gicurasi bateye igisasu cyo mu bwoko bwa ‘grenade’ mu kabari (ikirabo) kari muri zone ya Kamenge Mujyi wa Bujumbura. Ibi bibaye mu gihe hasigaye iminsi 10 ngo mu Burundi habe amatora, inzego zishinzwe umutekano ntacyo ziratangaza kuri iki gitero, ntihazwi niba cyakozwe ku mpamvu zijyanye n’amatora cyangwa ibibazo by’umutekano mucye bisanzwe bivugwa muri iki gihugu.
Umunyamakuru wigenga ukorera i Bujumbura utifuje gutangazwa amazina, yabwiye BBC ko iyi gerenade yatewe n’abantu bagambiriye kwica abantu benshi kandi bahise bahunga. Avuga ko aka kabari gaherereye ku muhanda wa 11 (11ème Avenue) hafi y’aho Zone ya Kamenge ihana imbibi na Cibitoke. Kugeza ubu ntibiramenyekana neza abapfuye n’abakomerekeyemo muri iki gitero. Hari amakuru avuga ko hari abantu babiri bahasize ubuzima. Uyu munyamakuru wa BBC yavuze bamaze kumenya amakuru ko igipolisi hari abantu cyataye muri yombi bakekwaho uruhare muri iki gikorwa. Inkuru ya BBC
