Abapfuye bazize igitero cy’abagizi ba nabi bari bitwaje intwaro zirimo ‘grenades’ mu muhanda uva mu Ntara ya Muramvya ugana muri Bujumbura tariki ya 9 Gicurasi 2021, bivugwa ko bamaze kuba 13.
Iki gitero cyagabwe ku modoka enye aba bantu barimo zirimo Toyota Probox n’itwara abagenzi y’ikigo cya Volcano, mu masaa moya y’umugoroba w’uwo munsi.
Minisiteri ishinzwe umutekano w’imbere mu Burundi, icyo gihe yatangaje ko abahise bagwa muri iki gitero ari 8, abandi bakaba barakomeretse, bakihutishirizwa mu bitaro.
Imyirondoro y’abapfuye bazize iki gitero igaragaza ko harimo: Colonel Onsephore Nizigiyimana wari mu mutwe w’ingabo za EAC zihora ziteguye n’umukobwa we witwa Queytha, ACP DéO Nikobahoze wari umupolisi, Ir Canisius Ndayiragije na Fidéle Iyamuremye wari umukozi wa Banki Nkuru y’u Burundi.
Harimo kandi Floribert Kwizera wakoreraga banki BCB, Ferdinand Munezero wari umukozi wa Radiyo Vyizigiro, Agronome Venerand Simbashizweko, Dyna Revocate Habonimana, Anaclet Hakizimana n’umwana witwa Muhoboze Maella.
Muri aba bapfuye, harimo abarashwe amasasu, abandi batwikirwa mu modoka barimo. Igipolisi cy’u Burundi giherutse gutangaza ko cyatangiye iperereza kugira ngo gite muri yombi abagabye iki gitero.
Ifoto: Ibumoso hari Col. Nizigiyimana, hagati hari ACP Nikobahoze, iburyo hari Iyaruremye/Pacifique Nininahazwe
Kurikira ibiganiro n’amavidewo binyura kuri Bwiza TV
