Minisiteri y’Ubutabera mu Burundi itangaza ko imfungwa zisaga ibihumbi bitatu zigiye kurekurwa ku mbabazi zahawe na Perezida Nkurunziza w’u Burundi.
Iyi ngingo yatangajwe na Minisitiri w’ubutabera, Kanyana Leontine, ku wa Kabiri tariki ya 26 Gashyantare 2019, ubwo yari kumwe n’abagomba kuzamufasha gushyira mu ngiro icyo cyemezo cy’umukuru w’igihugu.
Amezi yari agiye gushira ari abiri hategerejwe ko bishyirwa mu bikorwa nyuma yaho umukuru w’igihugu abitangarije ku itariki ya Mbere Mutarama uyu mwaka.
Ikinyamakuru UBM News gitangaza ko iyi ngingo ireba abakatiwe imyaka itarenze itanu, abakoze ibyaha bikomeye bakanakatirwa ibihano byo gufungwa imyaka iri hejuru y’itanu bakaba batarebwa n’izi mbabazi.
Mu mwaka wa 2018, nabwo Perezida Nkurunziza yatanze imbabazi ku mfungwa, bamwe mu bari bazihawe ngo ntabwo bemerewe gutaha, Imiryango iharanira uburenganzira bwa muntu ngo ikaba igiye gukurikirana impamvu yabiteye, inasaba ko n’aba basaga 3000 barekurwa vuba.
Nk’ uko Perezida Nkurunziza yabivuze mu ijambo risoza umwaka wa 2018, yavuze ko abemerewe imbabazi ari abakatiwe igihano kitarenze imyaka 5, bakaba bamaze kimwe cya kabiri cy’ igihano bafunze, abagore batwite, abonsa n’ abafite ubumuga.
