Bari imbere ya Perezida Gen. Maj. Evariste Ndayishimiye, Inteko Ishinga amategeko ndetse n’abacamanza b’Urukiko rushinzwe kurinda Itegekonshinga; Gen. Alain Guillaume Bunyoni uherutse kugirwa Minisitiri w’Intebe w’u Burundi na Prosper Bazombanza uherutse gutorerwa kuba Visi-perezida w’iki gihugu barahiriye inshingano bahawe.
Ni umuhango wabereye mu ngoro ishinga amategeko y’u Burundi kuri uyu wa gatatu tariki ya 24 Kamena 2020.
Aba bombi barahiye nyuma y’uko ku wa kabiri tariki ya 23 Kamena bemerejwe mu nama idasanzwe yahuje abagize inama ishinga amategeko, nyuma y’umunsi umwe Perezida Evariste Ndayishimiye yandikiye inteko ayisaba kubemeza.
Prosper Bazombanza yemejwe n’Inteko ishinga amategeko nka Visi-Perezida w’u Burundi ku majwi 91 kuri 94 y’abitabiriye itora, babiri bakaba baranze kumutora mu gihe umwe yifashe.
Alain-Guillaume Bunyoni we yemejwe nka Minisitiri w’Intebe ku majwi 92 kuri 94 y’abatoye. Bunyoni wari mu bapolisi ba mbere bakuru bubashywe kandi batinyitse mu Burundi, abaye Minisitiri wa mbere w’iki gihugu nyuma y’imyaka irenga 20 ntawe kigira.
U Burundi bwaherukaga Minisitiri w’Intebe mu mwaka wa 1998, nyuma y’imyaka ibiri Pierre Buyoya ahiritse ku butegetsi Sylivestre Ntibantunganya akagira Pascal Ndimira Firmin Minisitiri w’Intebe w’u Burundi.
Magingo aya nyuma y’uko mu Burundi hatangajwe Visi-perezida na Minisitiri w’Intebe bashya, byitezwe ko mu gihe cya vuba hagomba gutangazwa abandi bayobozi bashya muri Guverinoma y’iki gihugu.
