Bwiza

Burundi: Perezida Ndayishimiye yirukanye Gen. Ndababishije mu gipolisi

Amakuru•
Denis Nsengiyumva
By Denis Nsengiyumva
•Kuwa Kabiri, 17 Ugushyingo 2026 saa 12:36
Burundi: Perezida Ndayishimiye yirukanye Gen. Ndababishije mu gipolisi

Brigadier General wa Polisi Romuald Ndababishije yirukanwe muri Polisi y’Igihugu cy’u Burundi (PNB) hakurikijwe iteka rya Perezida ryashyizweho umukono ku wa 14 Ugushyingo 2026. Iki cyemezo kishingiye ku bikorwa bya ruswa no kurenga bikomeye ku mategeko agenga itangwa rya pasiporo.

Ibi bibaye mu gihe uyu mupolisi mukuru afungiwe muri Gereza Nkuru ya Mpimba i Bujumbura, nyuma y’ibyumweru hafi bitatu yamaze afungiwe mu nyubako z’Urwego rw’Igihugu rushinzwe Iperereza (SNR). Biteganyijwe ko azagezwa imbere y’umucamanza ku wa 26 Ugushyingo.

Romuald Ndababishije yafashwe ubwo yari avuye mu butumwa muri Ethiopia, mu buryo butarasobanuka neza, maze afunganwa n’abandi bapolisi batatu. Nyuma yaje koherezwa muri Gereza Nkuru ya Mpimba, iherereye mu murwa mukuru w’ubukungu w’igihugu.

Iki kibazo, gifitanye isano n’itangwa rya pasiporo, cyamaze kuzamura ibibazo bitandukanye ku bijyanye n’uko yafashwe ndetse n’ibyaha ashinjwa.

Iteka rya Perezida nomero 100/173 ryo ku wa 14 Ugushyingo 2026, mu ngingo yaryo ya mbere, rivuga ko Brigadier General wa Polisi Romuald Ndababishije (ufite nomero y’akazi OPN 0463) yirukanwe ku mirimo ye azira ibikorwa bya ruswa no kurenga bikomeye ku mategeko agenga itangwa rya pasiporo.

Iki cyemezo, cyashyizweho umukono na Perezida Évariste Ndayishimiye i Gitega, umurwa mukuru wa politiki w’u Burundi, gitangira gukurikizwa ku munsi nyir’izina cyasinyweho.

Ikuvanwa mu kazi kwa Ndababishije kwateje impaka mu nzego z’umutekano no mu rwego rw’ubutabera. Nk’uko amakuru ava mu nzego z’umutekano agera kuri SOS Médias Burundi avuga, mu buryo busanzwe, umuyobozi ufite ipeti nk’iri ntiyakagombye kwirukanwa mbere y’uko hari icyemezo gifashwe n’urukiko, binyuze mu rubanza rw’urukiko rwa gisirikare cyangwa urw’inzego z’umutekano.

Abandi basesenguzi bavuga ko iyo ngingo yo guhana yagombaga gutegereza icyemezo cya nyuma cy’urukiko na nyuma y’uko inzira zose zo kujurira zikoreshejwe. Hakurikijwe iki gitekerezo, igihano gikomeye nk’iki nticyagakwiye gutangwa keretse igihe inzira zose z’amategeko zaba zarangiye burundu.

Icyakora, iyi myumvire ntihuriweho na bose. Undi wahoze ari Koloneli mu Ngabo z’Igihugu cy’u Burundi (FDNB) avuga ko, mu bihe bimwe na bimwe, "inzira zo guhana mu rwego rw’imyitwarire zishobora kubanziriza izo mu nkiko."

Nk'uko amakuru aturuka mu muryango we abivuga, Gen. Ndababishije n'abo bareganwa, biteganyijwe ko bazitaba umucamanza ku itariki ya 26 Ugushyingo.

Iburanisha rishobora gutanga ibisobanuro ku birego baregwa n’uruhare rwa buri muntu.
Mu gihe hategerejwe ko uyu mupolisi aza kwitaba urukiko, kwirukanwa k'uyu mupolisi byamaze gushyirwa mu bikorwa. Ikizava muri uru rubanza gitegerezanyijwe amatsiko.

Denis Nsengiyumva

Inkuru yanditswe na: Denis Nsengiyumva

Umunyamakuru wa BWIZA.COM wanditse inkuru 11,310.