Burundi: Umuntu umwe yiciwe mu kindi gitero cy’abitwaje intwaro

Igipolisi ko umuntu umwe yiciwe mu gitero cy’abantu bitwaje intwaro cyagabwe mu ijoro ryo kuwa Kabiri rishyira kuri uyu wa Gatatu muri Komini Fota, hagati mu gihugu cy’u Burundi.

Nk’uko byatangajwe n’Umuvugizi w’Igipolisi, Pierre Nkurikiye, ngo amasasu yavugiye mu masaha ya saa tanu z’ijoro muri Fota cyahitanye umuturage witwa uwitwa Dismas Ngendakuriyo.

Abagabye iki gitero bari bitwaje imbunda zo mu bwoko bwa Karachnikov, basubiye inyuma berekeza ku gasozi ka Buziracanda kegeranye n’aka Fota nyuma y’igitero.

Iyi nkuru dukesha ikinyamakuru Anadolu Agency ivuga ko igipolisi cyatangije iperereza ngo hamenyekane abihishe inyuma y’iki gitero.

Ni igitero cya kabiri cy’abantu bitwaje intwaro gikorewe mu burasirazuba bwo hagati bw’u Burundi mu gihe kitarenze ibyumweru.

Mu ijoro ryo ku itariki ya 09 rishyira iya 10 Gicurasi, abantu 13 barimo n’umusirikare wa leta ufite ipeti rya Colonel biciwe mu gitero cy’abantu bitwaje intwaro cyagabwe ku modoka enye mu Ntara ya Muramvya ihana imbibi n’Intara ya Mwaro.

Abagabye iki gitero nabwo nta numwe wigeze aatabwa muri yombi.

Mu gihe ibintu byasaga nk’ibituje muri iyi minsi ishize mu bijyanye n’umutekano kuva haba amatora rusange yo muri Gicurasi 2020, kuri ubu biravugwa ko bisa nk’aho byongeye gusubira ahabi muri iyi minsi.

Kuri ubu, kuva nyuma y’imvururu za politiki zadutse mu Burundi mu 2015, iki gihugu gifite imitwe itandukanye yitwaje intwaro irwanya ubutegetsi irimo za Forebu na Red-Tabara ikorera mu burasirazuba bwa Congo ndetse mu bihe byashize ikaba yaragiye yigamba ibitero bitandukanye ku butaka bw’u Burundi.

Kurikira ibiganiro n’amavidewo binyura kuri Bwiza TV